شمالی وزیرستان میں فورسز کی کارروائی، دہشت گرد ہلاک

پاک فوج کے شعبہ تعلقات عامہ (آئی ایس پی آر) کے مطابق سکیورٹی فورسز اور دہشت گردوں میں شمالی وزیرستان کے علاقے دتہ خیل میں جھڑپ ہوئی، شدید فائرنگ کے تبادلے میں دہشت گرد فرید احمد مارا گیا۔ 
ترجمان پاک فوج کا کہنا ہے کہ مارے گئے دہشت گرد سے اسلحہ اور گولہ بارود برآمد کرلیا گیا، ہلاک دہشت گرد فورسز کے خلاف دہشت گردی کی کارروائی میں ملوث تھا۔

آئی ایس پی آر کے مطابق مقامی افراد کی طرف دہشت گردوں کے خلاف آپریشن کی مکمل حمایت کی گئی، مقامی افراد نے دہشت گردی کے خاتمے کے لیے مکمل تعاون کا اظہار کیا۔

کچھ روز قبل شمالی وزیرستان میں دہشت گردوں نے فوجی قافلے پر حملہ کر دیا تھا جس کے نتیجے میں پاک فوج کے سات جوان شہید ہوگئے تھے۔

دہشت گردوں نے فوجی قافلے پر حملہ ایشام کے علاقے میں کیا۔ سکیورٹی فورسز نے جوابی کارروائی میں چار دہشت گردوں کو جہنم واصل کر دیا تھا۔

آئی ایس پی آر کا کہنا تھا کہ شہدا میں حوالدار طارق یوسف، سپاہی سلیمان وقاص، سپاہی جنید علی، سپاہی اعجاز حسین، وقار احمد، جواد امیر اور ارشد علی شامل ہیں۔

ترجمان پاک فوج کا کہنا تھا کہ دہشت گردوں کے خاتمے کے لیے علاقے میں کلیئرنس آپریشن جاری ہے، پاک فوج دہشت گردی کی لعنت کو ختم کرنے کے لیے پُرعزم ہے، ہمارے بہادر جوانوں کی قربانیاں عزم کو مزید مضبوط کرتی ہیں۔