عمران خان کا سوشل میڈیا پربراہ راست گفتگو کا فیصلہ

میڈیا ذرائع کے مطابق پاکستان تحریک انصاف کی آفیشل سوشل میڈیا ٹیم کو تیاریوں کی باضابطہ ہدایت کر دی گئی ہے۔

تفصیلات کے مطابق چیئرمین تحریک انصاف عمران خان کے زیرِ صدارت سیاسی کمیٹی کا اہم اجلاس ہوا جس میں ملکی مجموعی سیاسی صورت حال اور آئندہ کے لائحہ عمل پر تفصیلی تبادلہ خیال کیا گیا۔

اجلاس میں21 اپریل کو مینار پاکستان میں ہو نے والے جلسے کی تیاریوں پر تفصیلی بریفنگ دی گئی جبکہ جماعت کی آئندہ کی سیاسی حکمت عملی پر بھی تباد لہ خیال کیا گیا۔

حماد اظہر، منزہ حسن، عثمان ڈار اور فرخ حبیب نے جلسے سے قبل بڑی ریلیوں کے انعقاد پر بریفنگ دی۔

چیئرمین تحریک انصاف کی جانب سے ذمہ داران کو قافلوں کے ہمراہ بروقت جلسہ گاہ پہنچنے کی خصوصی ہدایات جاری کی گئیں۔

سابق وزیر اعظم عمران خان نے کہا کہ صاف شفاف انتخابات کے ذریعے عوام کو اپنے مستقبل کا موقع دینے کے علاوہ کوئی چارہ نہیں۔

انہوں نے کہا کہ کسی بھی ملک کی خودمختاری اور جمہوریت کا تحفظ عوام کرتے ہیں، سازش کے ذریعے حکومت کی تبدیلی کو قبول کیا گیا تو آئندہ کوئی سربراہِ حکومت بیرونی دباؤ کا سامنا کرنے کی جسارت نہیں کرے گا۔

چیئرمین پی ٹی آئی نے کہا کہ پوری قوم اپنی آزادی و خود مختاری کے لیے یکجا اور متحرک ہے، 21 اپریل کو مینارِ پاکستان کے تاریخی مقام سے پاکستان کی حقیقی آزادی و خودمختاری کا اعلان کریں گے۔