سلامتی کمیٹی کا اجلاس :امریکی خط میں سازش کا کوئی ثبوت نہیں ملا

تفصیلات کے مطابق وزیراعظم شہباز شریف کی سربراہی میں قومی سلامتی کمیٹی کا 38واں اجلاس  ہوا۔

سلامتی کمیٹی کے اجلاس میں امریکہ میں تعینات سابق پاکستانی سفیر اسد مجید نے دھمکی آمیز مراسلے پر بریفنگ دی۔

قومی سلامتی کمیٹی کے اعلامیے میں سلامتی کمیٹی کے گزشتہ اجلاس کے فیصلوں کی توثیق کی گئی ہے جن کے مطابق امریکی مراسلہ سازش نہیں مداخلت ہے۔

مزید کہا گیا ہے کہ خفیہ اداروں نے تحقیقات کیں، واشنگٹن میں پاکستانی سفارت خانے کو ٹیلی گرام موصول ہوا، تمام تر معلومات، مراسلوں کی بنیاد پر کمیٹی نے فیصلہ کیا کہ غیر ملکی سازش نہیں تھی۔

قومی سلامتی کمیٹی کے اجلاس میں سفیر اسد مجید کے علاوہ وزیر دفاع خواجہ آصف، وزیر داخلہ رانا ثنا اللہ، وزیر اطلاعات مریم اورنگزیب، وفاقی وزیر احسن اقبال، وزیرمملکت برائے امورخارجہ حنا ربانی کھر شامل تھیں۔

آرمی چیف جنرل قمر جاوید باجوہ، چیئرمین جوائنٹ چیفس آف اسٹاف کمیٹی، پاک فضائیہ اور بحریہ کے سربراہان بھی قومی سلامتی کمیٹی کے اجلاس میں شریک تھے۔