تحریک انصاف کا امریکی مراسلے پر بااختیار عدالتی کمیشن بنانے کا مطالبہ

سماجی رابطے کی ویب سائیٹ ٹوئیٹر پر جاری ایک پیغام میں قومی سلامتی کمیٹی کے اجلاس کے حوالے سے سابق وزیر اطلاعات فواد چودھری نے کہا کہ ہر نئےاجلاس سے معاملات مزید سنگین ہو رہے ہیں۔

انہوں نے کہا کہ سیکیورٹی کونسل کے آج کے اعلامیہ نے نئے سوالات اٹھا دیے ہیں، پاکستان کے عوام اس سازش کی تفصیل جاننا چاہتے ہیں۔

فود چودھری نے جوڈیشل کمیشن کا مطالبہ کرتے ہوئے کہا کہ چیف جسٹس معاملے کی نزاکت کا احساس کریں اور ایک طاقتور کمیشن کی تشکیل کی جائے۔

ہر نئےاجلاس سے معاملات اور سنگین ہو رہے ہیں، سیکیورٹی کونسل کے آج کے اعلامیہ نے نئے سوالات اٹھا دئیے ہیں پاکستان کے عوام اس سازش کی تفصیل جاننا چاہتے ہیں،چیف جسٹس معاملے کی نزاکت کا احساس کریں اور طاقتور کمیشن کی تشکیل کی جائے بظاہر موجودہ حکومت ایک بڑی بیرونی سازش کا نتیجہ ہے

— Ch Fawad Hussain (@fawadchaudhry) April 22, 2022

سابق وزیر خارجہ شاہ محمود قریشی نے پریس کانفرنس میں قومی سلامتی کمیٹی کے اعلامیہ پر اظہار خیال کرتے ہوئے کہا کہ آج ثابت ہوگیا کہ پاکستان میں سیاسی مداخلت ہوئی ہے۔

انہوں نے کہا کہ ہم چاہتے ہیں عدالت جوڈیشل کمیشن بنائے اور تحقیقات کرے، اسد قیصر چیف جسٹس آف پاکستان کو مراسلہ بھیج چکے ہیں، جوڈیشل کمیشن بن جاتا ہے تو بہت سے سوالوں کا جواب سامنے آجائے گا، جوڈیشل کمیشن یہ فیصلہ کرے کہ سازش ہوئی یا مداخلت۔