چیئرمین تحریک انصاف کی کارکنا ن کو اسلام آباد مارچ کی تیاری کرنے کی ہدایت

حکومت کے خاتمے کے بعد پہلی مرتبہ اسلام آباد میں پریس کانفرنس سے خطاب کرتے ہوئے سابق وزیر اعظم نے کارکنان کو ہدایت دی ہے کہ وہ اسلام آباد مارچ کی تیاری کریں۔

انہوں نے کہا کہ میں اسلام آباد کی حقیقی آزادی کے لیے جلد کال دوں گا، کارکنان اسلام آباد کی حقیقی آزادی کے لیے مارچ کی تیاری کریں۔

میڈیا سے گفتگو میں چیئرمین تحریک انصاف کا کہنا تھا کہ آج اپنی ساری تنظیموں کو محلوں کی سطح پر تیاری کا کہہ دیا ہے۔

انہوں  نے سپریم کورٹ سے سازش کے معاملے پر اوپن سماعت کرنے کا مطالبہ کرتے ہوئے کہا کہ یہ ملک کی آزادی کے خلاف بڑی واردات ہوئی ہے۔

انہوں نے کہا کہ دھمکی آمیز مراسلے پر سپریم کورٹ کو اب وہ کرنا چاہیے جو پہلے کرنا چاہیے تھا، سپریم کورٹ کو اس کی تحقیقات کرنی چاہیے تھی۔

عمران خان کا کہنا تھا کہ اگر تحقیقات نہ کی گئیں تو آئندہ کوئی وزیر اعظم دھمکیوں کے سامنے کھڑا نہیں ہو سکے گا، سپریم کورٹ تحقیقات کرے گی تو پتا چلے گا کون کون ملوث ہیں۔

انہوں نے کہا کہ قومی سلامتی کمیٹی نے تسلیم کیا مراسلہ حقیقت ہے، ملک کے وزیراعظم کو دھمکی دی گئی، سچ ہمیشہ سامنے آتا ہے، جس دن ڈونلڈ لو سے ان کی ملاقات ہوئی اگلے دن تحریک عدم اعتماد آئی۔

سابق وزیر اعظم نے اپنی گفتگو میں الیکشن کمشنر سے بھی مستعفی ہونے کا مطالبہ کیا، انہوں نے کہا کہ سب سے بڑی پارٹی کہہ رہی ہے چیئرمین الیکشن کمشنر پر اعتماد نہیں، الیکشن کمشنر کو مستعفی ہونا چاہیے۔