اعلیٰ شخصیات کے نام ای سی ایل سے نکالنے پر تحریک انصاف کا شدید رد عمل

تفصیلات کے مطابق حکومت نے 100 سے زائد افراد کے نام ای سی ایل سے نکال دیے ہیں جس پر پاکستان تحریک انصاف کے رہنماؤں نے سخت رد عمل کا اظہار کیا ہے۔

سماجی رابطے کی ویب سائیٹ ٹوئیٹر پر جاری پیغام میں سابق وفاقی وزیر اطلاعات فواد چودھری نے طنزاََ کہا کہ قوم کو مبارک ہو وزیر اعظم شہباز شریف، وزیر داخلہ سمیت آدھی کابینہ کے نام ای سی ایل سے نکال دیے گئے ہیں۔ انہوں نے کہا کہ انصاف کا جو نیا دور پاکستان میں آیا ہے تاریخ محمد شاہ رنگیلا کو بھی بھول جائے گی۔ 

قوم کو مبارک ہو وزیر اعظم شہباز شریف ، وزیر داخلہ سمیت آدھی کابینہ کے نام Exit Control List سے نکال دئیے گئے ہیں، ۔۔ انصاف کا جو نیا دور پاکستان میں آیا ہے تاریخ محمد شاہ رنگیلا کو بھی بھول جائیگی #امپورٹڈ_حکومت_نامنظور pic.twitter.com/tzWkZRRDYC

— Ch Fawad Hussain (@fawadchaudhry) April 23, 2022

رہنما تحریک انصاف شہباز گل نے اپنے ٹوئیٹ میں کہا کہ ملک کے وزیراعظم کا نام ایگزٹ کنٹرول لسٹ سے نکال دیا گیا، اب اس خبر کے بعد آپ اندازہ کر لیں کہ اخلاقیات قانون اور قاعدہ کا کیا حال ہے۔ شہباز گل نے کہا کہ جنہیں جیل میں ہونا چاہیے تھا وہ وزیراعظم کی کرسی پر ہیں۔

اور ملک کے وزیراعظم کا نام ای سی ایل لسٹ سے نکال دیا گیا۔ اب اس خبر کے بعد آپ اندازہ کر لیں کہ حالت کہاں جا چکے ہیں۔ اخلاقیات قانون اور قاعدہ کا کیا حال ہے۔ جنہیں جیل میں ہونا چاہئے تھا وہ وزیراعظم کی کرسی پر ہیں۔

— Dr. Shahbaz GiLL (@SHABAZGIL) April 23, 2022

واضح رہے کہ نئی ایگزٹ کنٹرول لسٹ پالیسی کے تحت وفاقی حکومت نے متعد اہم شخصیات کے نام ایگزٹ کنٹرول لسٹ سے خارج کردیے ہیں۔ ایگزٹ کنٹرول لسٹ سے خارج کیے جانے والے ناموں میں شریف خاندان کے نواز شریف، مریم نواز، شہباز شریف اور حمزہ شہباز کے نام شامل ہیں۔

بتایا گیا ہے کہ شریف خاندان کے علاوہ ای سی ایل سے خارج کیے گئے دیگر لیگی رہنماؤں کے ناموں میں شاہد خاقان عباسی، احسن اقبال، سعد رفیق، خوجہ آصف، رانا ثناء اللہ اور دیگر کے نام شامل ہیں۔

بتایا گیا ہے کہ حکومت نے مجموعی طور پر 100 سے زائد افراد کے نام ای سی ایل سے نکالے ہیں جن میں سابق صدر آصف علی زرادری اور فریال تالپور کے نام بھی شامل ہیں۔

ایگزٹ کنٹرول لسٹ سے خارج ہونے والی تمام شخصیات کے نام ایف آئی اے اور نیب کی سفارشات پر لسٹ میں شامل کیے گئے تھے۔