گورنر پنجاب کی وزیر اعلیٰ کا الیکشن کالعدم قرار دینے کی سفارش

تفصیلات کے مطابق گورنرپنجاب عمر سرفراز چیمہ نے وزیراعلیٰ کے انتخاب سے متعلق تحفظات کی 6 صفحات پر مبنی رپورٹ صدرمملکت کو ارسال کی تھی جو انہیں موصول ہو چکی ہے۔

میڈیا ذرائع کے مطابق گورنر پنجاب عمر سرفراز چیمہ نے رپورٹ میں پنجاب اسمبلی کے ایوان میں وزیراعلیٰ کے انتخاب میں ہونے والی آئینی خلاف ورزیوں کی نشاندہی کی۔

گورنر پنجاب کا کہنا ہے کہ وزیراعلیٰ کا انتخاب آئین اورقانون کے مطابق نہیں ہوا، انتخاب کی ووٹنگ کا ریکارڈ ٹیمپرڈ ہے، پولیس کو خلاف رولز ایوان میں داخل کیا گیا اور ارکان اسمبلی کوووٹ دینے سے روکا گیا۔

گورنرپنجاب کی رپورٹ کے متن کے مطابق ووٹنگ  آئین کے سیکنڈ شیڈول کے منافی طریقہ کار اختیار کرکے  کروائی گئی، ووٹنگ میں سیکنڈ شیڈول کو نظر انداز کیا گیا، رولز 21 رولز آف بزنس کے مطابق اسپیکر نے نتائج سے آگاہ کرنا ہوتا ہے جبکہ گورنر کا وزیراعلیٰ کے انتخابی عمل سے مطمئن ہونا ضروری ہوتاہے۔

کہا گیا کہ عثمان بزدار کااستعفیٰ بھی متنازع ہے جس میں آئین کے آرٹیکل130سب سیکشن آٹھ کی خلاف ورزی کی گئی، گورنرآفس کو وزیر اعلیٰ پنجاب عثمان بزدار کااستعفیٰ کبھی موصول نہیں ہوا،گورنر کو جب استعفیٰ موصول ہی نہیں ہوا تواس کو منظور کیسے کرسکتاہے۔

رپورٹ میں گورنرپنجاب نے سفارش کی وزیراعلیٰ کا الیکشن کالعدم قراردیاجائے، گورنر پنجاب نے صدرمملکت سے درخواست کی کہ حقائق کی روشنی میں ان کی آئینی طورپر رہنمائی کی جائے، اور تجویز کیاجائے کہ اس صورت حال میں انہیں کیا اقدامات کرنے چاہئیں۔