نومنتخب وزیراعلیٰ کے حلف کا معاملہ : حمزہ شہبازکی نئی درخواست سماعت کیلئے مقرر

تفصیلات کے مطابق نومنتخب وزیراعلی ٰ پنجاب حمزہ شہباز  کی  حلف برداری کیلئے آج دوبارہ ہائیکورٹ میں نئی درخواست دائر کی گئی جس کو سماعت کیلئے مقرر کر لیا گیا ، چیف جسٹس  لاہور ہائیکورٹ  امیر بھٹی کل  26 اپریل کو درخواست پر سماعت کریں گے ۔

 حمزہ شہباز کی جانب سے دائر کی گئی نئی درخواست میں وفاقی اور پنجاب حکومت کو فریق بنایا گیا ہے۔ درخواست میں وزیراعظم کو بذریعہ پرنسپل سیکرٹری فریق بنایا گیا ہے، صدر، چیئرمین سینیٹ کو بذریعہ سیکرٹری فریق بنایا گیا ہے۔

درخواست میں مؤقف اختیار کیا گیا ہے کہ لاہور ہائیکورٹ نے صدر پاکستان کو حلف کیلئے نمائندہ مقرر کرنے کی ہدایت کی تھی،تاہم عدالتی احکامات پر عملدرآمد نہیں کیا جا رہا۔

حمزہ شہباز نے درخواست میں استدعا کی ہے کہ عدالت کے حکم پر عملدرآمد کے لیے احکامات جاری کیے جائیں۔

خیال رہے  کہ لاہور ہائی کورٹ نے صدر پاکستان کو حلف کے لیے نمائندہ مقرر کرنے کی ہدایت کی تھی۔

یاد رہے کہ حمزہ شہباز 16 اپریل کوپنجاب اسمبلی میں بدترین ہنگامہ آرائی کے بعد  197 ووٹ حاصل کر کے وزیر اعلیٰ پنجاب منتخب ہوئے تھے تاہم ان کی حلف برداری کی تقریب اب تک نہیں ہوسکی ہے۔

گورنر پنجاب عمر سرفراز چیمہ نے عہدہ سنبھالنے کے بعد نو منتخب وزیراعلیٰ پنجاب حمزہ شہباز شریف سے حلف لینے سے انکار کردیا تھا۔