بجلی کے ساتھ ساتھ پانی کا بحران بھی خطرناک ہو گیا

تفصیلات کے مطابق گرمی کی لہر کے باوجود دریاؤں میں پانی کا بہاؤ انتہائی کم،تربیلا اور منگلا ڈیم میں بھی پانی کا ذخیرہ ختم ہو گیا ہے۔

ذرائع ارسا کے مطابق صوبہ پنجاب اور سندھ کو 54 فیصد پانی کے شارٹ فال کا سامنا ہے،گزشتہ سال ان دنوں دریاؤں میں پانی کا بہاؤ ایک لاکھ 52 ہزار 5 سو کیوسک تھا جبکہ اس وقت دریاؤں میں پانی کا مجموعی بہاؤ 86 ہزار 6 سو کیوسک ہے۔

ڈیموں میں گزشتہ سال ان دنوں پانی کا ذخیرہ 30 لاکھ ایکڑ فٹ تھا جو کہ آج کم ہو کر صرف 50 ہزار ایکڑ فٹ تک رہ گیا ہے۔ 

بتایا گیا ہے کہ ارسا نے صوبوں کے پانی کا کوٹہ بھی کم کر دیا ہے جس کے مطابق پنجاب کو ایک لاکھ 60 ہزار کی بجائے 49 ہزار کیوسک اور اسی طرح سندھ کو 67 ہزار کے بجائے 31 ہزار کیوسک پانی فراہم کیا جا رہا ہے۔

ذرائع ارسا کے مطابق پانی کے بحران سے کپاس اور گنے کی فصل بری طرح متاثر ہونے کا خدشہ ہے، جنوبی پنجاب اور سندھ میں پینے کا پانی بھی ناپید ہو سکتا ہے۔