لوڈ شیڈنگ حکومت کی غلط فیصلہ سازی کے باعث ہوئی:حماد اظہر

تفصیلات کے مطابق سابق وزیر توانائی حماد اظہر نے کہا ہے کہ ملک میں لوڈ شیڈنگ امپورٹڈ حکومت کی غلط فیصلہ سازی کے باعث ہوئی ہے۔

سماجی رابطے کی ویب سائیٹ ٹوئیٹر پر جاری پیغام میں حماد اظہر نے کہا کہ مقامی گیس کی ڈائیورشنز نہیں کی گئیں، ن لیگ کے ایل این جی معاہدے ڈیفالٹ کرگئے۔

انہوں نے کہا کہ ن لیگ نےسارا دارومدارفرنس آئل پر ڈال کراسٹاک بھی ختم کر دیا،صحیح حکمت عملی اپنائی جاتی تو لوڈشیڈنگ نہ ہوتی۔

انہوں نے کہا کہ عید کی چھٹیوں کے باعث انڈسٹری کا لوڈ ختم ہو جاتا ہے،امپورٹڈ حکومت چھٹیوں کی بنیاد پرلوڈشیڈنگ ختم ہونے کی امید لگائےبیٹھی ہے، ہمارے دور میں ایسی لوڈشیڈنگ کبھی نہیں ہوئی۔

اپنے ایک اور ٹوئیٹ میں انہوں نے کہا کہ ملک میں بجلی کی پیداواری صلاحیت موجود ہونے کے باوجود بدترین لوڈشیڈنگ ہے۔

حماد اظہر نے کہا کہ یہ امپورٹڈ حکومت کی نالائقی ہے کہ ملک میں ایک ماہ کا ڈیزل ہونے کے باوجود پٹرول پمپس پر ڈیزل کی کمی ہے۔