کراچی حملہ:اقوام متحدہ سلامتی کونسل کا مذمتی اعلامیہ جاری

تفصیلات کے مطابق اقوام متحدہ کی سلامتی کونسل نے کراچی میں دہشتگرد حملے پر مذمتی اعلامیہ جاری کیا ہے۔

اعلامیہ کے مطابق اقوام متحدہ کی سلامتی کونسل کے اراکین نے کہا ہے کہ جامعہ کراچی میں گھناؤنا اور بزدلانہ دہشتگرد حملہ انتہائی قابل مذمت ہے۔

سلامتی کونسل کے اعلامیہ میں کہا گیا کہ بلوچ لبریشن آرمی کے مجید بریگیڈ نے حملے کی ذمہ داری قبول کی تھی،دہشتگرد حملے میں 3 چینی باشندوں سمیت 4 شہری ہلاک، متعدد زخمی ہوئے۔

سلامتی کونسل کے اراکین نے متاثرہ خاندانوں، پاکستان اور چین کی حکومتوں سے دلی ہمدردی، تعزیت اور زخمیوں کی جلد، مکمل صحت یابی کی خواہش کا اظہار کیا گیا۔

کہا گیا کہ ہر قسم کی دہشتگردی بین الاقوامی امن و سلامتی کے لیے سنگین خطرات کا پیش خیمہ ہے، دہشتگرد کارروائیوں کے مرتکب افراد، منتظمین، مالی معاونین کو انصاف کے کٹہرے میں لایا جائے۔

تمام ریاستیں بین الاقوامی قانون، سلامتی کونسل قراردادوں کے تحت اپنی ذمہ داریاں پوری کریں،تمام ممالک، پاکستان اور چین کے ساتھ ساتھ دیگر متعلقہ حکام کے ساتھ فعال تعاون یقینی بنائیں۔

جاری اعلامیہ کے مطابق دہشتگردی کی کوئی بھی کارروائی مجرمانہ اور بلاجواز ہے،تمام ریاستیں اقوام متحدہ کے چارٹر، بین الاقوامی قانون، انسانی حقوق اور  قوانین کا احترام کریں۔

تمام ریاستیں انسداد دہشتگردی کے لیے ہر طرح سے کاوشیں یقینی بنائیں،دہشتگرد کارروائیوں کے باعث بین الاقوامی امن، سلامتی کو شدید خطرات لاحق ہیں۔