مسجد نبویﷺ واقعہ پر صاحبزادہ جہانگیر کا مؤقف سامنے آگیا

سماجی رابطے کی ویب سائیٹ ٹوئیٹر پر جاری پیغام میں صاحبزادہ جہانگیر نے کہا کہ مدینہ شریف میں کل جو واقعہ ہوا اس پر میڈیا، سوشل میڈیا ہر جگہ میرا نام اور انیل مسرت کا نام لیا جارہا ہے اس حوالے سے میں وضاحت دینا چاہتا ہوں۔

انہوں نے کہا کہ ہم سعودی عرب دو دن پہلے آئے تھے، ہم نے عمرہ کیا، اس کے بعد میں اور انیل مسرت مدینہ شریف آئے، اور مدینہ میں ایک رات قیام کرنا چاہتے تھے۔

صاحبزادہ جہانگیر نے کہا کہ جب ہم مدینہ شریف میں بیٹھے ہوئے تھے، نماز پڑھ رہے تھے، افطاری کا وقت تھا تو وہاں پر بگٹی صاحب اور مریم اورنگزیب تشریف لائیں، جب یہ لوگ داخل ہوئے تو میں نے دیکھا کہ پیچھے سے بڑا شور مچ رہا ہے، میں پیچھے مڑ کر دیکھا تو پاکستانی وہاں پر جمع تھے۔

My video message in response to yesterday incident at Madina Shareef involving PMLN. It is shameful that to save their humiliation from general public they used the social media & TV channels spreading fake information about myself and Aneel Mussarat. How low can they fall. pic.twitter.com/sD0Fb2qxLL

— Sahibzada Jahangir (@ChicoJahangir) April 29, 2022

اپنے ویڈیو پیغام میں انہوں نے کہا کہ میں واضح کرنا چاہتا ہوں کہ نہ انیل مسرت نے اس قسم کی کوئی فنڈنگ کی نہ میں نے کوئی آرگنائزنگ کی ہے، خدا کے واسطے اللہ رسول کو سیاست کے بیچ میں نہ لائیں، ہم عبادت کرنے گئے تھے۔

صاحبزادہ جہانگیر نے کہا کہ جن لوگوں نے وہاں شور مچایا وہ اپنے فعل کے ذمہ دار خود ہیں،میڈیا پر شور مچایا گیا کہ ہمیں پولیس نے پکڑ لیا ہے تو میں بتادوں کہ ہمیں نہ تو پولیس نے گرفتار کیا نہ ہی ہم سے کوئی پوچھ گچھ ہوئی ہے۔

واضح رہے کہ گزشتہ کل بھی مسجد نبویﷺ میں ناخوشگوار واقعہ پیش آنے کے فوراََ بعد صاحبزادہ جہانگیر نے اپنے ایک ٹوئیٹ میں اس کی مذمت کی تھی۔