بات یہاں ختم نہیں ہوگی، صدر پاکستان ایکشن لیں گے: پرویز الٰہی

جی این این کے پروگرام فیس ٹو فیس میں عائشہ بخش کے ساتھ گفتگو کرتے ہوئے پرویز الٰہی نے کہا کہ میں نے عدلیہ کا ہمیشہ احترام کیا ہے، لیکن جو فیصلہ آیا ہے، اگر سنگل بنچ نے فیصلہ دینا ہے تو اتنی رات گئے جب کورٹس کا وقت ختم ہو چکا ہو اس وقت فیصلہ دینے کی کیا ضرورت ہے۔

انہوں نے کہا کہ اس میں دیکھنے والی بات یہ کہ جو دو آئینی بحران پیدا ہو گئے ہیں یہ ٹھیک نہیں ہوں گے، ابھی پٹیشن چل رہی ہے، فیصلہ کچھ بھی ہو سکتا ہے۔

اسپیکر پنجاب اسمبلی نے کہا کہ گورنر پنجاب اور کابینہ کے لوگ اندر بیٹھے ہوئے تھے، ان کو ان کے سامان سمیت باہر پھینک دیا گیا اور وہاں آ کر قبضہ کر لیا گیا۔

انہوں نے کہا کہ یہ بات یہاں ختم نہیں ہوگی، صدر پاکستان نے بھی اسبھی اس پر ایکشن لینا ہے، یہ بات تو ابھی شروع ہوئی ہے۔

واضح رہے کہ مسلم لیگ ن کے رہنما حمزہ شہباز نے آج عدالتی حکم پر  پنجاب کے 21 ویں وزیراعلیٰ کی حیثیت سے حلف اٹھا لیا ہے۔

وزیر اعلیٰ پنجاب کی تقریب حلف برداری گورنر ہاؤس کے لان میں ہوئی جس میں مہمانوں کی بڑی تعداد بھی شریک ہوئی، جس میں اسپیکر قومی اسمبلی راجہ پرویز اشرف نے حمزہ شہباز سے وزیراعلیٰ پنجاب کا حلف لیا۔

یہ بھی یاد رہے کہ حمزہ شہباز 16 اپریل کو پنجاب اسمبلی کے ہنگامہ خیز اجلاس میں وزیراعلیٰ منتخب ہوئے تھے، انہیں پنجاب اسمبلی کے 197 اراکین نے ووٹ دیے تھے۔

دوسری جانب گورنر پنجاب عمر سرفراز چیمہ نے عثمان بزدار کا استعفیٰ آئینی اعتراض لگا کر مسترد کر دیا ہے جس کے بعد عثمان بزدار بھی وزیر اعلیٰ کے عہدے پر بحال ہو گئے ہیں۔