پاکستان تحریک انصاف آج مردان میں پاور شو کرے گی

تفصیلات کے مطابق مردان میں پی ٹی آئی کے زیر انتظام حقیقی آزادی تحریک کے سلسلے میں جلسہ عام منعقد کیا جارہا ہے، جلسے اور ریلی کی تمام تیاریاں مکمل کرلی گئیں ہیں۔ جلسے سے چیئرمین عمران خان سمیت مرکزی قائدین خطاب کرینگے۔

پنڈال میں بڑی تعداد میں کرسیاں لگادی گئیں ہیں  جبکہ کارکنوں کی جلسہ گاہ آمد جاری ہے ،  شہر بھر میں بڑے بڑے  خیرمقدمی بینرز آویزاں کر دئیےگئے ہیں ۔ 

گزشتہ روز مردان جلسے کے حوالے سے چیئرمین پاکستان تحریک انصاف عمران خان نے اپنے پیغام میں کہا کہ اہلِ مردان! ہمارا مقصد ایک ہےکہ ہم غیرت مندقوم ہیں،ایک بیرونی سازش کے نتیجے میں کرپٹ لوگوں کو مسلط کیا گیا، ہم خود پر مسلط کرپٹ لوگوں کو کبھی تسلیم نہیں کریں گے.

انہوں نے  مزید کہا کہ یہ امپورٹڈ حکومت نامنظور ہے، 13 مئی کومیں آپ کے پاس آرہا ہوں، مزید گفتگو 13 مئی کی شام کومردان میں پہنچ کر کروں گا۔

واضح رہے کہ ملک کے مختلف شہروں میں پاکستان تحریک انصاف کے جلسے کیے جارہے ہیں ، گزشتہ روز بھی عمران خان نے اٹک میں جلسے سے خطب  کیا ، ان جلسوں کے بعد، عمران خان آزادی مارچ کی تاریخ کا اعلان کریں گے۔