ملک   کے 3 ٹکڑوں کا خواب دیکھنے والی جماعت کے 300 ٹکڑے ہونے چاہئیے : مریم نواز 

تفصیلات کےمطابق اسلام آباد میں میڈیا سے گفتگو کرتے ہوئے نائب صدر مسلم لیگ ن  مریم نواز نے کہا کہ پاکستان ہمیشہ قائم رہے گا ، پی ٹی آئی کے 300 ٹکڑے ہونگے ، پوری قوم نے عمران خان کے بیان کا نوٹس لیا ہے قوم میں غصہ ہے، عمران خان بتائيں یہ تین ٹکڑوں والا نظریہ کس نے آپ کو دیا ہے، یہ کس کا نظریہ ہے ؟ کیا یہ نظریہ آپ کو زیڈ گولڈ اسمتھ نے دیا ہے یا اسرائیل نے دیا۔

مریم نواز نے کہا کہ دماغی ماہرین کا بورڈ عمران خان کا ذہنی اور نفسیاتی معائنہ کرے، اقتدار کے چلے جانے پر عمران خان حواس کھوچکا ہے۔

انہوں نے کہا کہ  حکومت سے اپیل ہے کہ دماغی، نفسیاتی امراض کے ماہرین کا عمران خان کے لیے ایک بورڈ بنائے، یہ پاکستان کے لئے دی گئی قربانیوں کی توہین کی ہے ،  اقتدار تو اس کا کبھی تھا ہی نہیں، عمران خان اقتدار کے شروع کے 30 دن میں ناکام ہوا اور اب اقتدار چلے جانے کے بعد 30 دن میں پھر بے نقاب ہوا۔

مریم نواز نے کہا کہ عمران خان کو کیا حق ہے کہ ایٹمی پروگرام پر بات کرے، عمران خان کا پاکستان کے ایٹمی پروگرام میں کیا کردار ہے  ؟ انہوں نے کہا کہ بھٹو شہید ہوئے، بے نظیر شہید ہوئیں لیکن آواز آئی  پاکستان کھپے۔

نائب صدر ن لیگ نے کہا کہ عمران خان نے ماضی میں بھی کہا تھا کہ پاکستان کو ایٹمی پروگرام کی ضرورت نہیں، عمران خان کو کیا حق ہے کہ ایٹمی پروگرام پر بات کرے ، ملک کے ایٹمی پروگرام میں اس کا کیا کردار ہے ؟  اگر آپ نے افواج پاکستان کو سیاست میں گھسیٹنے کی کوشش کی تو سب سے پہلے محب وطن پاکستانیوں سے نمٹنا ہوگا ۔  آج آپ عدلیہ کو سیاست میں گھسیٹ رہے ہیں کہ میرا لانگ مارچ نہیں ہو پا رہا میری مدد کرو، ادارے کے سپہ سالار آپ کیساتھ کھڑے تھے تو صحیح فیصلہ ہے، آج اگرسپہ سالار آئین کیساتھ کھڑے ہیں تو میر جعفر اور میر صادق ہو گئے۔

مریم نواز کا مزید کہنا تھا کہ کہتےہیں جہاد کیلئے نکلو لوگوں نے دیکھا جہاد ہیلی کاپٹر میں لٹکا ہوا تھا، عمران خان اپنی جماعت کو اور کارکنوں کو دھوکہ دیکر بنی گالہ چلےگئے، کوئی ایک شخص بتا دیں جس کیساتھ عمران خان نے وفا کی ہو، اپنے آپ کو انقلابی لیڈر کہنے والا ضمانتی لیڈر ہے۔

مریم نواز نے بتایا کہ ہم نے کئی بار اقتدار کھویا،اللّٰہ نے پھر اقتدار دیا، یہ شخص اقتدار میں رہتے ہوئے ملک کیلئے تباہی تھا، جب یہ اقتدار میں تھا تو کسی نے سوموٹو نوٹس نہیں لیا، یہ چاہتا تو قوم کی تقدیر بدل سکتا تھا۔