ملک کو آگے لے جانے کے لیےگرینڈ ڈائیلاگ کی ضرورت ہے:شہباز شریف

لاہور میں انڈس اسپتال کی افتتاحی تقریب سے خطاب کرتے ہوئے وزیر اعظم شہباز شریف نے کہا کہ ہمیں اپنی پسند ناپسند اور انا سے بالاتر ہو کر ملکی مفاد میں فیصلے کرنا ہوں گے۔

انہوں نے کہا کہ ملک میں معیشت کی حالت خراب ہے، ہمسایہ ملک بھارت سے ہمارے تعلقات کشیدہ ہیں، مسائل کے حل کے لیے گرینڈ ڈائیلاگ کرنا ہوگا، تمام سٹیک ہولڈرز سے گرینڈ ڈائیلاگ کی ضرورت ہے۔

وزیر اعظم نے کہا کہ ساڑھے 3 سال ملک میں جو ہوا اس کا حساب لینا ہے یا نہیں اور کیا صرف مجھ سے حساب لینا ہے، میں اپنے دو ڈھائی مہینوں کا حساب دینے کو تیار ہوں، پیٹرولیم مصنوعات کی قیمتوں میں اضافے کا فیصلہ دل پر پتھر رکھ کر کیا ہے،پوری کوشش کروں گا کہ غریب آدمی کو ریلیف دیں۔

وزیر اعظم شہباز شریف نے میٹرو بس ٹکٹ کے نرخ آدھے کرنے کا اعلان بھی کیا، انہوں نے کہا ملکی معیشیت کا پہیہ تیز کرنے کی کوشش کریں گے، پاکستان اگلے چند سالوں میں راکٹ کی طرح آگے بڑھے گا، اس کے لیے ہم سب کو محنت کرنی ہے۔