پارلیمنٹ میں الیکشن ترمیمی ایکٹ اور نیب ترمیمی بل کثرت رائے سے منظور

تفصیلات کے مطابق صدر مملکت کی طرف سے واپس بھیجے گئے انتخابات ایکٹ میں ترمیم اور نیب آرڈیننس میں ترمیم کے قوانین کثرت رائے سے منظور کرلیےگئے ہیں۔

پارلیمنٹ کے مشترکہ اجلاس میں منظور ہونے والی نئی ترامیم کی رو سے اب عام انتخابات میں الیکٹرانک ووٹنگ مشین کے استعمال کا استعمال نہیں ہوگا، اوورسیز پاکستانیوں سے انٹرنیٹ ووٹنگ کے ذریعے ووٹ کا اختیار واپس لے لیا گیا ہے۔

انتخابات ترمیمی ایکٹ میں ترمیم کے ساتھ ساتھ نیب آرڈیننس میں بھی ترمیم کی گئی ہے جس نیب کے اختیارات کو محدود کر دیا گیا ہے، اب بار ثبوت ملزم کے بجائے نیب پر ہوگا۔

پارلیمنٹ کے مشترکہ اجلاس میں جماعت اسلامی کے سینیٹر مشتاق احمد کی جانب سے دونوں قوانین میں ترامیم پیش کی گئیں جنہیں مستردکردیا گیا جبکہ اپوزیشن جماعت جی ڈی اے نے الیکشن ترمیمی ایکٹ 2022 کی مخالفت کی۔

واضح رہے کہ اس سے قبل صدر مملکت عارف علوی نے نیب آرڈیننس میں ترمیم اور انتخابات ترمیمی بل بغیر منظوری کے ہی وفاقی حکومت کو واپس بھجوا دیے تھے اور نظرثانی کی ہدایت کی تھی۔

مملکت مرتضیٰ جاوید عباسی نے پارلیمنٹ کے مشترکہ اجلاس میں انتخابات ترمیمی بل پیش کرتے ہوئے کہا تھا کہ صدر مملکت کی جانب سے انتخابات ترمیمی بل 2022ء واپس بھیجا گیا، صدر صرف بلز پر نظرِ ثانی کا کہہ سکتے ہیں، صدر کی تجاویز کے بغیر بھی پارلیمنٹ کا مشترکہ اجلاس بل منظور کر سکتا ہے۔