جے یو آئی کے شیرانی گروپ اورتحریک انصاف کے مابین اتحاد کا باضابطہ اعلان

فضل الرحمان کے پرانے ساتھی مولانا خان شیرانی نے 25 رکنی گروپ کے ہمراہ خیبر پختونخواہ ہاؤس پہنچے، جہاں انہوں نے چیئرمین تحریک انصاف عمران خان سے ملاقات میں سیاسی و مذہبی معاملات میں اتحاد کا اعلان کیا۔

میڈیا رپورٹس کے مطابق دونوں جماعتوں نے اتحاد و شراکت کا باضابطہ اعلان کردیا ہے جبکہ  باہمی مشاورت سے سیاسی و انتخابی حکمت عملی مرتب کرنے پر بھی مکمل اتفاق کیا گیا ہے۔

سابق وزیر اعظم سے ملاقات میں مولانا محمد شیرانی نے کہا کہ اسلاموفوبیا کے تدارک کے خلاف جدوجہد مشترکات میں سے ہے، دونوں جماعتوں میں رفاقت کو نتیجہ خیز ایجنڈے کی صورت میں ڈھالیں گے۔

چیئرمین تحریک انصاف عمران خان نے کہا کہ جے یو آئی پاکستان کے سربراہ اور عمائدین کا خیر مقدم کرتا ہوں، بلند مقاصد کے حصول کے لیے جدوجہد سیاست کا امتیاز ہے، اہل علم آگے بڑھیں اور قوم کی درست سمت میں رہنمائی فرمائیں، دونوں جماعتوں کے مابین طے پانے والے معاملات کی کامیابی کے لیے دعاگو ہوں۔