بھارت سے تعلقات بنائے تو یہ کشمیریوں سےغداری ہوگی:عمران خان

چیئرمین تحریک انصاف عمران خان نے مہنگائی کے خلاف ملک بھر میں جاری احتجاجی مظاہروں سے ویڈیو لنک کے ذریعے خطاب کرتے ہوئے کہا کہ بلاول بھٹو نے کہا بھارت سے اچھے تعلقات ہونے چاہئیں، ہم نے بھی بھارت کے ساتھ اچھے تعلقات بنانے کی کوشش کی تھی لیکن جب بھارت کی جانب سے کشمیر کی خصوصی حیثیت ختم کی گئی توہم نے ان سے ناطہ توڑ دیا، اب اگر بھارت سے تعلقات بناتے ہیں تو یہ کشمیریوں سےغداری ہوگی، ان کے سلیم مانڈی والا اسرائیل سے تعلقات بنانے کی بات کرتے ہیں۔

سابق وزیر اعظم نے کہا کہ خرم دستگیر نے ٹی وی پروگرام میں کہا کہ اگرعمران خان رہ جاتا توانہوں نے ہمیں جیلوں میں ڈال دینا تھا، خرم دستگیر کی بات سے ثابت ہو گیا کہ یہ صرف این آراو 2 لینے حکومت میں آئے، ہمیں پتا تھا کہ ان کے پاس قابلیت نہیں ہے یہ صرف اپنے کیسزختم کرنے آئے ہیں، پہلے ان کومشرف نے این آراو دیا اب ان کواین آراو 2 مل گیا، ہم نے اپنے دور میں اداروں کوآزادی سے کام کرنے دیا، جب ہم ایف اے ٹی ایف پر قانون سازی کررہے تھے تو انہوں نے نیب قوانین میں ترمیم کی کوشش کی، جب نیب قانون تبدیل ہو گا تو کل ان کے 1200 ارب کے کرپشن کیسزختم ہوجائیں گے، نیب نے ہمارے دور میں 480 ارب روپے ریکورکیے۔

انہوں نے کہا کہ  اس وقت ملکی معیشت تیزی سے نیچے جا رہی ہے، امریکہ سے سازش ہوئی اوریہاں کے میرجعفراورمیرصادق ساتھ مل گئے، ہم نے نیوٹرلزکو سازش سے متعلق سمجھایا تھا، میں نے کہا تھا کہ اگرسازش کے تحت حکومت کو گرا دیا گیا تو سنبھالا نہیں جائے گا، شوکت ترین کو کہا تھا کہ ان کوکہہ دیں اورسازش کوناکام بنا دیں، کورونابحران کے دوران ہم نے معیشت کو تباہی سے بچایا، ہم نےآئی ایم ایف سے معاہدہ کیا لیکن قوم کا خیال رکھا، یہ امریکہ کےغلام ہیں اس لیے روس سے سستا تیل نہیں خرید رہے، ڈالر 208 پر پہنچ گیا، خدشہ ہے پاکستان میں سری لنکا جیسے حالات پیدا نہ ہو جائیں۔