پنجاب کا نیا اسپیکر کون ؟ فیصلہ آج ہوگا

تفصیلات کے مطابق  پنجاب اسمبلی کے آج ہونیوالے اجلاس میں  اسپیکر کے لئے حکومتی اتحاد کے سبطین خان ، اپوزیشن اتحاد کے سیف الملوک کھوکھر کے درمیان مقابلہ ہوگا ۔

اسپیکر کے انتخاب کے لئے  خفیہ ووٹنگ کے زریعے  ارکان اپنی رائے کااظہار کریں گے ۔ 

حکومت اتحاد کو 186 ارکان کی حمایت حاصل ہے  جبکہ  اپوزیشن اتحاد کے پاس  178 ارکان کی حمایت ہے ۔  مسلم لیگ ن خفیہ ووٹنگ میں اپ سیٹ کے لئے پرامید ہے جبکہ  تحریک انصاف کو اپنی تعداد سے زیادہ ووٹ حاصل ہونے کا یقین  ہے ۔ 

اجلاس میں  ڈپٹی اسپیکر کے خلاف عدم اعتماد کی تحریک پر بھی آج ہی ووٹنگ ہوگی ، گذشتہ روز پی ٹی آئی کے رہنما راجا بشارت نے اسپیکر پنجاب اسمبلی کے انتخاب اور ڈپٹی اسپیکر کے خلاف عدم اعتماد کی قرارداد پنجاب اسمبلی میں جمع کروائی تھی۔

ایوان میں جمع کروائی گئی قرارداد کو کثرت رائے سے منظورکرلیا گیا تھا، جس کے بعد پنجاب اسمبلی کے اسپیکر کا انتخاب کا آج ہوگا۔

قبل ازیں پنجاب حکومت اور اتحادیوں نے ڈپٹی اسپیکر دوست محمد مزاری کے خلاف تحریک عدم اعتماد پیش کرنے کا فیصلہ کیا تھا۔اسمبلی میں تحریک عدم اعتماد جمع ہونے کے بعد 14 روز میں کارروائی کی جائے گی۔