ڈار کے امریکہ جاتے ہی ڈالر کی قیمت میں اضافہ

22 ستمبر کو انٹر بینک میں ڈالر کی قدر 239 روپے 71 پیسے تھی تاہم اس کے بعد ڈالر کی قدر میں کمی واقع ہونے لگی تھی۔ گزشتہ روز انٹر بینک میں ڈالر 217 روپے 79 پیسے پر بند ہوا تھا۔

بدھ (12 اکتوبر)کے روز انٹر بینک میں 19 روز بعد روپے کی پرواز تھم گئی اور ڈالر کی قدر میں اضافہ دیکھا گیا۔

انٹر بینک میں کاروباری اوقات ختم ہونے تک ڈالر کی قدر 9 پیسے اضافے کے بعد 217 روپے 79 پیسے سے بڑھ کر 217 روپے 88 پیسے ہوگئی۔ 

اوپن مارکیٹ میں تو گزشتہ روز ہی ڈالر کی قدر میں اضافہ ہونا شروع ہوگیا تھا۔ بدھ کے روز امریکی ڈالر ایک روپے اضافے کے ساتھ 220 روپے ہوگیا۔

واضح رہے کہ وزیر خزانہ اسحاق ڈار نے کہا تھا کہ ڈالر کی قدر 200 روپے سے زیادہ نہیں، رواں ماہ ڈالر کی قدر اس کی حقیقی شرح مبادلہ پر آجائے گی۔