سینیٹر اعظم سواتی کا دوروزہ جسمانی ریمانڈ منظور

پی ٹی آئی کے رہنما، سینیٹر اعظم سواتی کو ایف آئی اے سائبر کرائمز نے رات گئے گرفتار کرکے آج صبح اسلام آباد کے سینیئر سول جج شبیر بھٹی کی عدالت میں پیش کیا ۔

ایف آئی اے حکام نے اعظم سواتی کو سات روزہ جسمانی ریمانڈ پر حوالے کرنے کی استدعا کی تاہم عدالت نے دو روزہ جسمانی ریمانڈ کی منظوری دی۔

ایف آئی اے سائبر کرائمز سیل کی جانب سے سینیٹر اعظم سواتی کو رات گئے سوشل میڈیا پر متنازع بیان کا مقدمہ درج کر کے  گرفتار کیا گیا تھا۔

عدالت میں پیشی کے موقع پر اعظم سواتی نے میڈیا سے بات کرتے ہوئے کہا کہ قانون کی خلاف وزری نہیں کی، انسانی حقوق اور آئین کی خلاف وزری نہیں کی، مجھے ایف آئی اے نے ایک ٹوئٹ گرفتار کیا۔

عدالت نے ایف آئی اے حکام کو ہدایت کی  کہ وہ اعظم سواتی کو فوری طور پر پمز ہسپتال لے جا کر اُن کا میڈیکل کرائیں ۔ عدالت نے  حکم دیا کہ آئندہ سماعت پر ملزم اعظم سواتی کا میڈیکل کرا کر پیش کیا جائے ۔ 

دوسری جانب پی ٹی آئی کے جنرل سیکریٹری اسد عمر نے اعظم سواتی کی گرفتاری کی مذمت کرتے ہوئے ان کی فوری رہائی کا مطالبہ کیا ہے۔