سیلاب سے بے گھر تین کروڑ 30 لاکھ افراد کی بحالی کیلئے فوری امداد کی ضرورت ہے : وزیراعظم

تفصیلات کے مطابق قاز قستان کے دارالحکومت آستانہ میں ایشیا میں روابط اور اعتماد سازی کے اقدامات کے بارے میں چھٹی سربراہ کانفرنس سے خطاب کرتے ہوئے وزیراعظم  نے کہا اس میں کوئی شک نہیں شدید بارشیں اور سیلاب جن کی وجہ سے اس وقت ایک تہائی پاکستان پانی میں ڈوبا ہوا ہے عالمی حدت اور موسمیاتی تبدیلی کا نتیجہ ہیں۔

انہوں نے کہا حکومت نے سیلاب زدگان کے بچاو، امداد اور بحالی کے لئے تمام دستیاب وسائل بروئے کار لائے ہیں۔ موسمیاتی تبدیلی نے صحیح معنوں میں ہمیں بے بس کردیا ہے۔

 شہباز شریف نے کہا اگرچہ پاکستان عالمی سطح پر کاربن کے اخراج میں ایک فیصد سے بھی کم کاذمہ دار ہے لیکن ہم ان اولین دس ممالک میں شامل ہیں جنہیں موسمیاتی تبدیلی نے سب سے زیادہ متاثر کیا ہے۔

سیلاب متاثرین کیلئے امداد فراہم کرنے والے ممالک کاشکریہ ادا کرتے ہوئے وزیراعظم شہباز شریف کا کہنا تھا کہ  پاکستان اس سلسلے میں تسلسل کے ساتھ مزید امداد کا منتظر ہے  کیونکہ ہمارے ملک کو اب تعمیر نو اور بحالی کے مشکل مرحلے کا سامنا ہے۔

واضح رہے کہ گزشتہ روز وزیراعظم شہباز شریف ایشیا میں اعتماد سازی کے اقدامات پر ہونے والے سربراہی اجلاس میں شرکت کے لیے قازقستان پہنچے تھے۔