سندھ ، پنجاب اور بلوچستان میں بجلی کا بڑا بریک ڈاؤن

رپورٹ کے مطابق کراچی کو بجلی فراہم کرنے والی پانچ سو کے وی کی ہائیٹینشن پاور ٹرانسمیشن لائن ٹرپ کرگئی ہے، جس کی وجہ سے شہر کے ستر فیصد علاقے بجلی سے محروم ہیں۔ ذرائع کا کہنا ہے کہ موسم کے باعث نمی سے ہائی پاور ایکسٹینشن لائن ٹرپ ہوگئی ہے۔

بجلی معطل ہونے کی شکایت گولیمار، ناظم آباد، نارتھ کراچی، شادمان ، بفرزون، ڈی ایچ اے، کلفٹن، پی ای سی ایچ ایس، بہادرآباد، کے ڈی اے، گلشن، ملیر ہالٹ، گلشن، رفاع عام، صددر، لیاقت آباد، فیڈرل بی ایریا، ناظم آباد، ضلع جنوبی، غربی، گلستان جوہر، ملیر سمیت متعدد علاقوں سے موصول ہوئی۔

ترجمان کے الیکٹرک کے مطابق مکمل بحالی میں اندازاً 5 گھنٹے لگ سکتے ہیں، بریک ڈاؤن سے شہر کے مختلف علاقوں میں بجلی منقطع ہوئی ہے۔ اچانک بڑے ایریا میں بجلی منقطع ہونے کی وجوہات تلاش کر رہے ہیں۔

ترجمان نے مزید بتایا کہ ملک کے دیگر شہروں سمیت کراچی میں بجلی فراہمی میں تعطل آیا ہے۔ بجلی بندش کی وجوہات کی تحقیقات کے ساتھ ٹیمز بحالی کیلئے متحرک ہیں۔ صارفین رہنمائی کیلئے کے ای سوشل میڈیا پلیٹ فارم سے رابطہ کریں۔

پاور ڈویژن کی جانب سے جاری اعلامیہ میں کہا گیا ہے کہ ملک کے جنوبی حصے ميں بجلی کی ٹرانسمیشن سسٹم میں خرابی پیدا ہوئی ہے۔ خرابی کے باعث متعدد پاور پلانٹس مرحلہ وار ٹرِپ ہو رہے ہیں۔

اعلامیہ میں مزید کہا گیا ہے کہ ملک کے جنوبی علاقوں میں بجلی کی ترسیل میں رکاوٹ آ رہی ہے۔ وزارتِ توانائی پوری تندہی سے خرابی کی وجہ جاننے کی کوشش کر رہی ہے۔ جلد از جلد بجلی کے ترسیلی نظام کو مکمل بحال کر لیا جائے گا۔