عمران خان کی دو مقدمات میں ضمانت منظور

اسلام آباد کی ڈسٹرکٹ سیشن عدالت میں عمران خان کے خلاف خاتون جج کو دھمکی دينے کے مقدمے کی سماعت ہوئی۔

پروسیکیوٹر واجد منیر نے عدالت کو بتایا کہ چیئرمین تحریک انصاف عمران خان پر اشتغال انگیز تقریر کا مقدمہ درج ہے، تھانہ کوہسارمیں درج مقدمہ میں505 دفعہ لگی جوناقابل ضمانت ہے۔

عمران خان کے وکیل بابراعوان نے اپنے دلائل میں بتایا کہ عمران خان کے خلاف 2 مقدمات درج ہیں، کوہسارمیں درج مقدمات میں تمام ملزمان کی ضمانتیں منظورہو چکی ہیں۔

بابر اعوان نے مؤقف پیش کیا کہ تھانہ مارگلہ میں درج مقدمے میں دہشت گردی کی دفعہ لگی تھی جو ہائی کورٹ نے ختم کر دی، عمران خان نے بیان دیا تھا کہ آئی جی، ڈی آئی جی تمہیں نہیں چھوڑيں گے،کیس کریں گے، شہباز گل پر تشدد کیا گیا اس پر عمران خان نے کہا تھا کیس کریں گے۔

پروسیکیوٹر واجد منیر نے مؤقف اختیار کیا کہ عمران خان نے سرکاری ملازمین کو دھمکیاں دی۔

جج کامران بشارت مفتی نے پروسیکیورٹر سے استفسار کیا کہ یہ جلسہ کدھر ہو رہا تھا، اگر ایف نائن پارک میں ہو رہا تھا تو پھر دفعہ 144 کیسے لگی، اس مقدمہ میں 506 ٹو تو نہیں لگی۔

جج کامران بشارت مفتی نے ریمارکس دیئے کہ عمران خان کے خلاف درج مقدمہ میں قابل ضمانت دفعات ہیں۔

عدالت نے خاتون جج کو دھمکی دینے کے کیس میں عمران خان کی ضمانت منظور کرلی، جب کہ 50 ہزار روپے کے ضمانتی مچلکے جمع کرانے کا بھی حکم دے دیا۔

عمران خان کے وکلاء نے 50 ہزار روپے کے نقد ضمانتی مچلکے جمع کرا دیئے۔