ورلڈ بینک اور آئی ایم ایف سے کیے وعدے پورے کیے جائینگے : وزیر خزانہ

تفصیلات کے مطابق واشنگٹن میں پریس بریفنگ دیتے ہوئے  وزیرخزانہ اسحاق ڈار کا کہنا تھا کہ دورہ امریکا کے دوران ورلڈ بینک،آئی ایم ایف کواعتماد دلانا تھا کہ پاکستان اپنی معاشی پالیسیوں کو جاری رکھے گا۔

انہوں نے کہا کہ بجٹ ریفارمز میں 15 سے 20 فیصد تک کام رہ چکا ہے ، توانائی سیکٹر میں ریفارمز کا عمل بھی جاری رہےگا،فیٹف کی میٹنگ ہونے والی ہے،امید ہے پاکستان گرے لسٹ سے نکل آئے گا۔

اسحاق ڈا ر نے مزید کہا کہ پاکستان نے بلیک لسٹ میں جانے سے بچنے کے لیے بہت کام کیا، فیٹف نے کوئی اعتراض کیا تو اس کو دور کرنےکی کوشش کریں گے۔ 

انہوں نے کہا کہ ورلڈ بینک اور دیگراداروں نے سیلاب سے 32.4 ارب ڈالر کے نقصانات کا تخمینہ لگایا ہے،سیلاب سے بحالی کے لیے پاکستان پہلے ہی کام کر رہا ہے۔

اسحاق ڈار کا کہنا تھا کہ اب تک سیلاب سے بحالی پر 99 ارب روپے لگائے جا چکے ہیں اور مزید کام جاری رہےگا۔ 

ان کا کہنا تھا کہ ہمارے پاس آپشن تھا کہ عدم اعتماد نہ لاتے، ہمیں سیاست اور ریاست میں سے کسی ایک کو بچانا تھا۔ 

انہوں نے کہا کہ عمران خان غیر ذمہ دارانہ بیانات دیتے ہیں جس سے امریکا کی طرف سے شکوک و شبہات کا اظہار ہوتا ہے،  پاکستان کا کمانڈ اینڈ کنٹرول سسٹم انتہائی مضبوط اور محفوظ ہے۔