یوکرین جنگ نے 40 لاکھ بچوں کو غربت میں دھکیل دیا : یونیسف

اقوام متحدہ کے ذیلی ادارے برائے اطفال یونیسف نےغربت سے متعلق 22 ممالک کے اعدادوشمار پر مبنی رپورٹ  میں کہا ہے کہ  یوکرین میں جنگ کے سبب پیدا ہونے والے معاشی بحران کا سب سے زیادہ بوجھ بچے اٹھا رہے ہیں ۔  تنازعے اور بڑھتی ہوئی مہنگائی کے باعث 2021 کے مقابلے میں ایسے بچوں کی تعداد میں رواں سال 19 فیصد اضافہ ہوا ۔

رپورٹ کے مطابق فروری میں ہمسایہ ملک پر حملے کے بعد روسی اور یوکرینی بچے سب سے زیادہ متاثر ہوئے ہیں۔

رپورٹ میں کہا گیا ہے کہ 28 لاکھ بچے ایسے گھروں میں رہ رہے ہیں جو خط غربت سے نیچے زندگی گزار رہے ہیں ۔ یوکرین میں نصف ملین اضافی بچے غربت میں زندگی گزار رہے ہیں ۔

اسی طرح رومانیہ میں بھی مزید ایک لاکھ 10ہزار بچے غربت میں مبتلا ہیں۔ 

رپورٹ میں  یونیسف نے وضاحت کرتے ہوئے کہا کہ ایک خاندان جتنا غریب ہوگا اس کا مطلب یہ ہوگا کہ ان کی آمدنی کا اچھا خاصا حصہ اشیائے خوردونوش اور دیگر اخراجات پر لگے گا ۔   بچوں کی صحت اور تعلیم پر بہت ہی کم خرچ ہوگا، بچے تشدد، استحصال اور نامناسب رویے کے خطرے سے زیادہ دوچار ہیں ، اس کا نیتجہ ایسے سامنے آیا کہ رواں برس چار ہزار 500 بچے اپنی سالگرہ سے قبل  انتقال کرگئے  اور ایک لاکھ 17 ہزار بچوں نے سکول چھوڑا۔

واضح رہے کہ آج دنیا بھر میں غربت کے خاتمے کا عالمی دن منایا جارہا ہے ۔ اس سال اس دن کا موضوع ہے '' عملی طور پر سب کے لئے وقار'' ۔

اس موقع پر اقوام متحدہ نے دنیا بھر کے ہر فرد سے کہا ہے کہ وہ سماجی انصاف اور امن کیلئے جدوجہد کا عزم کرے ۔ بیان میں کہا گیا ہے کہ بہت سے لوگ مسلسل غربت کا شکار ہیں اور اب تک ایک ارب تیس کروڑ کے لگ بھگ افراد خط غربت سے نیچے زندگی گزار رہے ہیں جن میں زیادہ تعداد بچوں اور جوانوں کی ہیں۔