کورونا وائرس اب بھی گلوبل ہیلتھ ایمرجنسی ہے : عالمی ادارۂ صحت

عالمی ادارۂ صحت (ڈبلیو ایچ او )  کی ایمرجنسی کمیٹی نے مارچ 2020 میں کورونا وائرس کو ایک عالمی وبا قرار دیا تھا، جس کے بعد دنیا بھر میں لاک ڈاؤن اور سفری پابندیاں عائد کی گئیں۔

عالمی ادارۂ صحت  کا کچھ ماہ قبل یہ  کہنا تھا کہ دنیا کے مختلف حصوں میں کورونا کیسز کم ہو رہے ہیں لیکن ہمیں اس پر نظر رکھنی ہوگی، کچھ ممالک کو اپنی کمزور آبادی پر ویکسین لگوانے کیلئے زور دینا چاہیے۔

عالمی ادارۂ صحت   کی کمیٹی نے اپنے حالیہ بیان میں کہا ہے کہ اگرچہ عوامی تاثر یہ ہے کہ دنیا کے کچھ حصوں میں یہ وائرس ختم ہو چکا ہے ، لیکن یہ صحت عامہ کا ایک ایسا واقعہ ہے جو دنیا کی آبادی کے ایک حصے کو بری طرح سے متاثر کر رہا ہے۔

کمیٹی کے مطابق اگرچہ کورونا کیسز سے ہونیوالی  اموات میں کمی آئی ہے لیکن اب بھی دوسرے وائرسز کے مقابلے میں زیادہ ہلاکتیں کورونا کی وجہ سے ہی واقع ہو رہی ہیں۔

عالمی ادارہ صحت کے ڈائریکٹر جنرل ڈاکٹر ٹیڈروس کا کہنا ہے کہ اس وبائی مرض نے ہمیں پہلے بھی حیران کیا ہے اور اب بھی دوبارہ کیسز میں اضافہ ہوسکتا ہے، کورونا وائرس آج بھی ایک گلوبل ایمرجنسی ہے۔