4بجے تک اجلاس نہ ہوا تو پرویز الٰہی وزیر اعلیٰ نہیں رہیں گے، گورنرآرٹیکل 234 کے تحت وفاق کو گورنر راج کا کہہ سکتے ہیں ، راناثناء اللہ

تفصیلات کے مطابق پنجاب میں ایک اور آئینی بحران سراٹھانے لگا ہے ، وزیراعلیٰ پنجاب پرویزالٰہی کو اعتماد کا ووٹ لینے کے لیے گورنر سے جاری ہدایات کے بعد آئینی بحران شدت اختیار کرتا جارہا ہے ، 

 وزیرداخلہ راناثنااللہ نے کہا ہے کہ گورنرنے آئین کے مطابق اجلاس بلایا ہے ، گورنر پنجاب آج چار بجے نیا نوٹیفیکشن جاری کردیں گے جس کے بعد پرویزالہٰی وزیراعلیٰ نہیں رہیں گے ۔ رانا ثنااللہ کا کہنا ہے کہ ممکنہ طور پر وزیراعلیٰ کے لیے ان کے امیدوار حمزہ شہباز شریف ہیں ۔ 

اور اگر مزاحمت جاری رہی تو گورنر آرٹیکل 234 کے تحت گورنر راج کے لیے وفاق کو کہہ سکتے ہیں ، راناثنااللہ کا مزید کہناتھاکہ ا س وقت ان کے پاس 170 ووٹ ہیں جبکہ ان کو 186 ووٹ درکار ہیں ، ان کا مزید کہناتھاکہ میں دو تین روز سے کہہ رہا ہوں کہ ان کے پاس ووٹ پورے نہیں ہیں۔

آئین میں لکھا ہے کہ وزیراعلیٰ اعتماد کا ووٹ نہ لیں تو وہ وزیراعلیٰ نہیں رہ سکتے ، جبکہ کسی بھی ہنگامی صورتحال سے نمٹنے کے لیے وزیراعلیٰ ہاؤس کے پاس کنٹینر پہنچا دیے گئے ہیں ۔

دوسری جانب پی ٹی ائی رہنما فرخ حبیب کا کہنا ہے کہ گورنر کی جانب جاری کردہ پہلا نوٹیفیکشن بھی غیر آئینی تھا، 

رانا ثنا اللہ نے کہا کہ نئے وزیر اعلیٰ کے انتخاب تک پرویز الہٰی صرف روزمرہ کے امور نمٹا سکیں گے اور وزیر اعلیٰ کا آفس سیز ہونے کے بعد پرویز الہٰی اسمبلی توڑنے کی ایڈوائس نہیں دے سکیں گے۔ اگر انہوں نے مزاحمت کی تو آئین کے نفاذ کے لیے گورنر راج کی گنجائش موجود ہے۔

انہوں نے کہا کہ میں نے وزیر اعلیٰ ہاؤس کو سیل کرنے کی بات نہیں کی اور وزیر اعلیٰ ہاؤس کو سیل کرنے کا کوئی جواز بھی نہیں بنتا۔ پنجاب کے نئے وزیر اعلیٰ کا فیصلہ ن لیگ کی پارلیمانی پارٹی کرے گی۔

ن لیگ کے ممکنہ وزیر اعلیٰ کے متعلق انہوں نے کہا کہ ممکنہ طور پر حمزہ شہباز ہی بطور وزیر اعلیٰ ہمارے امیدوار ہیں تاہم نئی صورت حال کے مطابق پارلیمانی پارٹی ہی حتمی فیصلہ کرے گی۔ 4 بجے اجلاس منعقد نہ ہوا تو سمجھا جائے گا کہ اسپیکر نے جان بوجھ کر گورنر کی ایڈوائس پر عمل نہیں کیا۔

وزیر داخلہ نے کہا کہ پی ٹی آئی چیئرمین عمران خان اور اس کے کارکنان گمراہی کی آخری حد کو پہنچے ہوئے ہیں اور عمران خان کا بنیادی ایجنڈا ہی یہی ہے کہ ملک دیوالیہ کیا جائے۔ عدالت سے عمران خان کو کوئی ریلیف نہیں ملنے والا اور اعتماد کا ووٹ لینے کے علاوہ ان کے پاس کوئی چارہ نہیں ہے۔ نواز شریف سے ہر بات کی جاتی اور رائے لی جاتی ہے۔