پائیدار امن کیلئے دہشتگردوں اور سہولت کاروں کا گٹھ جوڑ توڑ دینگے : آرمی چیف

پاک فوج کے شعبہ تعلقات عامہ (آئی ایس پی ار) کے مطابق آرمی چیف جنرل سید عاصم منیر نے شمالی وزیرستان اور تربیلا کا دورہ کیا۔

آرمی چیف کی آمد پر کور کمانڈر پشاور نے استقبال کیا جبکہ آرمی چیف نے میرانشا میں یادگار شہدا پر حاضری دی، پھول چڑھائے اور فاتحہ خوانی کی۔

آرمی چیف کو فیلڈ کمانڈرز نے علاقے کی تازہ ترین سیکیورٹی صورتحال سے آگاہ کیا۔ آرمی چیف نے جانوں کا نذرانہ پیش کرنے والے بہادر سپاہیوں کو خراج عقیدت پیش کیا۔ 

جنرل سید عاصم منیر نے پاک افغان سرحد پر تعینات جوانوں سے ملاقات کی اور افسروں و جوانوں کی پیشہ ورانہ مہارت اور بلند حوصلے کو سراہا۔

اس موقع پر آرمی چیف جنرل سید عاصم منیر نے کہا کہ  دہشت گردوں اوران کے سہولت کاروں کے گٹھ جوڑ کے خاتمےکےلیےپرعزم ہیں ،  سماجی واقتصادی ترقی سے دیرپا امن یقینی بنایا جا سکتا ہے۔

آرمی چیف نے ایس ایس جی کے افسران اور جوانوں بشمول الضرار کمپنی سے ملاقات کی اور کہا کہ ایس ایس جی قوم کا فخر ہے۔