سعودی عرب : رمضان کا چاند نظر نہیں آیا، پہلا روزہ 13 اپریل کو ہوگا

تفصیلات کے مطابق سعودی عرب میں رمضان کا چاند نظر نہیں آیا۔سعودی   کمیٹی کی جانب سے اعلان کیا گیا ہے کہ مملکت میں کہیں  بھی چاند نظر نہیں آیا جس کے بعد پیر 12 اپریل کو 30 شعبان المعظم ہوگی اور پہلا روزہ 13 اپریل منگل کو ہوگا۔

محکمہ موسمیات کے مطابق  لاہور میں 13 اپریل کو رمضان کا چاند دکھائی دینے کا امکان ہے،محکمہ موسمیات کے مطابق لاہور شہر میں 13 اپریل کو مطلع صاف رہے گا۔محکمہ موسمیات نے مزید کہا ہے کہ رمضان المبارک کے دوران موسم گرم اور خشک رہے گا،جبکہ  15 روزوں کے بعد درجہ حرارت میں اضافہ ہو گا۔

دوسری جانب ، چاند دیکھنے کے لئے مرکزی رویت ہلال کمیٹی کا اجلاس 13 اپریل کو ہوگا۔

اس سلسلے میں  وزارت سائنس وٹیکنالوجی اور وفاقی وزیر برائے سائنس و ٹیکنالوجی فواد چوہدری نے اپریل کے شروع میں علیحدہ ٹویٹس میں پیش گوئی کی تھی کہ اس سال پہلا روزہ 14 اپریل کو ہوگا۔ان کا  مزید کہنا تھا کہ  رمضان کا چاند اسلام آباد ، لاہور ، پشاور اور کراچی میں واضح طور پر نظر آئے گا۔

رمضان کا چاند 13 اپریل کی شام کو لاہور،اسلام آباد،پشاور سمیت کئ دیگر شہروں میں واضع طور پر دیکھا جاسکے گا اور چودہ اپریل کو پہلا روزہ ہو گا۔ خدا یہ رمضان سب کیلئے رحمت اور برکت کا باعث کرے آمین https://t.co/d0DXRoRQaw

— Ch Fawad Hussain (@fawadchaudhry) April 3, 2021

واضح رہے کہ مرکزی رویت ہلال کمیٹی پاکستان کو سرکاری سطح پر چاند نظر آنے کا اعلان کرنے کا اختیار حاصل ہے۔

نومنتخب مرکزی رویت ہلال کمیٹی پاکستان کے چیئرمین نے فواد چوہدری کے ٹویٹ پر برہمی کا اظہار کیا تھا۔

رویت ہلال کمیٹی کے چیئرمین مولانا عبد الخیر آزاد نے کہا کہ ماضی میں چاند دیکھنے کے حوالے سے متعدد اعلانات کی وجہ سے ملکی امیج کو نقصان پہنچا ہے۔انہوں  نے کہا کہ یہ شریعت کی خلاف ورزی  نہیں ہے لیکن ملک میں رمضان اور عید کی مختلف تاریخیں ہونا قومی امیج کو نقصان پہنچاتا ہے۔

مولانا عبدالخیر آزاد  نے مزید  کہا کہ ریاست نے مرکزی رویت ہلال کمیٹی پاکستان کو یہ اختیار دیا ہے کہ وہ اسلامی ماہ کے آغاز کے لئے نئے چاند کے بارے میں کوئی حتمی اعلان کرے۔فواد چوہدری کو کمیٹی کے اجلاس کا انتظار کرنا چاہئے تھا کیونکہ وزارت سائنس کا ایک سینئر عہدیدار کمیٹی کا ممبر ہے۔

چیئرمین نے کہا ، "ہم رمضان کے مہینے کا چاند دیکھنے  کے لئے 13 اپریل کو پشاور میں اگلا اجلاس منعقد کر رہے ہیں اور مفتی پوپل زئی سے درخواست کی گئی ہے کہ وہ خود یا  اپنے نمائندوں میں سے کسی ایک کو بھی اتفاق رائے سے فیصلہ کرنے کے لئے بھیجیں۔"

مرکزی رویت ہلال کمیٹی پاکستان کے سربراہ مولانا عبد الخیر نے کہا کہ پہلی بار ، مرکزی کمیٹی نے ضلعی سطح پر رویت ہلال کمیٹیاں تشکیل دی ہیں تاکہ اس بات کا یقین کیا جاسکے کہ عینی شاہدین سے پوچھ گھچ کی جاسکے۔