رمضان 2021: رواں سال طویل اور مختصر ترین روزہ کن ممالک میں ہوگا؟

دنیا بھر  میں رمضان المبارک  کے   مقدس  مہینہ   کا   آغاز  ہورہا ہے ، تمام مسلمان مسلسل دوسرے سال  کورونا وائرس  کی احتیاطی تدابیر  کے ساتھ  رمضان کی تیاریوں میں مصروف ہیں   ۔جغرافیائی لحاظ سے  روزے کے اوقات ایک ملک سے دوسرے ملک میں مختلف ہوتے ہیں۔ قطب شمالی کے نزدیک  ممالک طویل  دورانیے  جبکہ قطب جنوبی کی طرف رہائش پذیر مسلمان مختصر دورانیے کا روزہ رکھتے ہیں ۔  کسی ملک میں روزہ کا دورانیہ ساڑھے دس گھنٹے کاہو گا تو کسی ملک میں  23گھنٹے کا روزہ رکھا جائے گا۔یہ وہ ممالک ہیں جہاں سورج 20 اپریل سے 22اگست تک غروب نہیں ہو گا ۔ اگر روزے کے طویل دورانیے کی بات کی جائے تو فن لینڈ اس اعتبار سے طویل ترین دورانیے والا ملک ہوگا جہاں روزہ داروں کو 23 گھنٹے 5 منٹ کا روزہ رکھنا ہوگا۔

عرب میڈیا کے مطابق  رمضان المبارک کے ایام میں مغربی ممالک میں الجزائر اور تیونس میں ماہ رمضان کے ابتدائی دنوں میں روزے کا دورانیہ 14 گھنٹے 39 منٹ جبکہ آخری ایام میں 15 گھنٹے 50 منٹ پر محیط پر ہوگا۔غیراسلامی ممالک میں فن لینڈ میں روزہ 23 گھنٹے 5 منٹ جبکہ روس میں 20 گھنٹے 45 منٹ کا ہوگا، ارجنٹائن  میں سب سے کم دورانیہ ہوگا جہاں دن 12 گھنٹے 23 منٹ پر محیط ہوگا۔

 سعودی عرب کے دارالحکومت میں ماہ رمضان کے ابتدائی دنوں میں روزہ 14 گھنٹے جبکہ آخری دنوں میں 14 گھنٹے 42 منٹ، مکہ میں 13 گھنٹے 51 منٹ اورآخری ایام 14 گھنٹے 7 منٹ پرمحیط ہونگے۔ امارات میں 14 گھنٹے 17 منٹ سے لے کر 15 گھنٹے 19 منٹ جبکہ عمان میں روزہ 14 گھنٹے ایک منٹ اور آخری عشرے میں 14 گھنٹے 41 منٹ کا ہوگا۔ قطر میں رمضان کے آغاز میں دن 14 گھنٹے 6 منٹ اور آخری دنوں میں 14 گھنٹے 50 منٹ جبکہ بحرین میں روزہ 14 گھنٹے 9 منٹ اور آخری ایام 14 گھنٹے 54 منٹ کے ہونگے۔ ٹورنٹو کے مکین 15سے 16 گھنٹے کا روزہ رکھیں گے۔صوفیہ (بلغاریہ)،روم،اوٹاوا، بخار سٹ ، میڈرڈ ، لسبن (پرتگال) ، ایتھنز ، واشنگٹن ڈی سی، ترکی اور بیجنگ میں 15سے 16 گھنٹے کا روزہ ہو گا۔