شہباز شریف کی ضمانت کیس میں نیا موڑ سامنے آگیا

تفصیلات کے مطابق مسلم لیگ ن کے صدر شہبازشریف کی ضمانت کے کیس میں نیا موڑ سامنے آگیا،  لاہورہائیکورٹ کے آن لائن پورٹل پر کیس کی نوعیت بدل دی گئی ۔ جہاں لفظ"اجازت"لکھا گیا تھا وہاں اب لفظ " ڈسپوز آف"  کردیا گیا ہے ۔

لاہور ہائیکورٹ کے  آن لائن  پورٹل کے مطابق شہبازشریف کی درخواست ضمانت نمٹا دی گئی،گذشتہ روز شہبازشریف کی درخواست ضمانت پر "اجازت"لکھا گیا تھا۔

شہباز شریف کی درخواست ضمانت کی سماعت کے بعد درخواست منظور ہونے کا فیصلہ تو سامنےآگیا تھا، مگر تحریری فیصلہ سامنے نہیں آسکا۔

ذرائع کے مطابق دو رکنی بنچ کے ایک فاضل جج جسٹس اسجد جاوید گھرال  نے فیصلے پر دستخط نہیں کئے ،  کیس کی سماعت کے دو دن بعد بینچ تحلیل کردیا گیا ۔ نئے روسٹر کے مطابق  جسٹس سرفراز ڈوگر ملتان جبکہ جسٹس اسجد جاوید گھرال  بہاولپور بینچ میں فرائض انجام دیں گے۔

یاد رہے کہ28 ستمبر 2020 کو   لاہورہائی کورٹ نے منی لانڈرنگ کیس میں شہباز شریف کی درخواست ضمانت مسترد کر دی تھی جس کے بعد نیب نے شہباز شریف کوحراست میں لے لیا تھا۔قومی احتساب بیورو (نیب) کی ٹیم نے سابق وزیر اعلیٰ پنجاب کو کمرہ عدالت سے حراست میں لیا تھا۔