حکومت کا دواؤں کی قیمتوں میں کمی لانے کیلئے بڑا قدم

تفصیلات کے مطابق  وزیراعظم آفس کی ہدایت پر ڈرگ ریگولیٹری اتھارٹی نے بڑا ایکشن لے لیا۔ڈاکٹرز کو نسخہ جات میں برانڈ ادویات کا نام لکھنے کے بجائے "جینرک"لکھنے کی ہدایت کردی۔ ڈاکٹرز کی جانب سے مریضوں کو مخصوص برانڈز کی ادویات لکھ کر دینے پر ڈرگ ریگولیٹری اتھارٹی نے ایکشن لیا ہے۔

ڈاکٹر مخصوص کمپنیوں کی ادویات لکھ کر دیتے ہیں ،مریضوں نے وزیر اعظم پورٹل پر ڈاکٹرز کے خلاف شکایات کے انبار لگا دیے تھے جس پر وزیراعظم آفس کی ہدایات کےبعد ڈرگ ریگولیٹری اتھارٹی حرکت میں آگئی۔ملک بھر میں ڈاکٹرز کو اپنے نسخہ جات میں برانڈ ادویات کے نام لکھنے کےبجائے صرف سالٹ کا نام لکھنے کا حکم دے دیا ۔ڈرگ لاء فورم کے صدر نور مہر کا کہنا ہے کہ فیصلے سے ادویات کی قیمتوں میں کمی آئے گی ۔

ڈریپ کے مطابق اس پریکٹس سے ملکی معیشت اور مریضوں  پر اضافی بوجھ پڑتا ہے۔ڈاکٹرز کی جانب سے ایسا کرنا میڈیکل اینڈ ڈینٹل پریکٹیشنرز کے کوڈآف کنڈکٹ کی بھی خلاف ورزی ہے۔