تنویر الیاس کی اپیل خارج، خواجہ فاروق قائم مقام وزیراعظم مقرر

توہین عدالت کیس میں آزاد کشمیر سپریم کورٹ نے سابق وزیراعظم آزاد کشمیر سردار تنویر الیاس کی اپیل خارج کردی، تنویر الیاس کی نااہلی کے بعد خواجہ فاروق کو قائم مقام وزیراعظم مقرر کردیا گیا۔

سردار تنویر الیاس کی قانونی ٹیم نے آج سپریم کورٹ میں نااہلی کے خلاف پیٹیشن دائر کی۔ چیف جسٹس سپریم کورٹ آزاد کشمیر راجہ سعید اکرم نے ریمارکس دیے کہ اپیل کا ٹائٹل درست نہیں، آپ کل دوبارہ اپنی اپیل لے کر آئیں۔ اپیل پر سردار تنویر الیاس کو وزیراعظم آزاد کشمیر لکھا گیا ہے۔

چیف جسٹس نے دورانِ سماعت سوال کیا کہ اگر تنویر الیاس وزیراعظم آزاد کشمیر ہیں تو اپیل دائر کرنے کی ضرورت ہی کیوں ہے؟ انہوں نے مزید کہا کہ فیصلہ غلط یا ٹھیک ہوا، اس پر فیصلہ بعد میں ہوگا۔

دوسری طرف سینیئر وزیر خواجہ فاروق کو قائم مقام وزیراعظم آزاد کشمیر مقرر کردیا گیا۔ خواجہ فاروق نئے وزیراعظم کے انتخاب تک فرائض سر انجام دیں گے۔ صدر آزاد کشمیر بیرسٹر سلطان محمود کی طرف سے دستخط کرکے سمری بھجوا دی گئی۔