وزیراعظم محمد شہباز شریف کی متوازن بجٹ پیش کرنے پر اقتصادی ٹیم کی تعریف

اسلام آباد: وزیراعظم محمد شہباز شریف نے تمام تر مشکلات کے باوجود ٹیکس فری متوازن بجٹ پیش کرنے پر اقتصادی ٹیم کی تعریف کرتے ہوئے کہا ہے کہ معیشت کو اصلاحات کی اشد ضرورت ہے، یہ سیاسی استحکام سے ہی ممکن ہے۔

میثاق معیشت عوام کی خوشحالی اور ترقی کا واحد راستہ ہے، سرکاری ملازمین کی تنخواہوں میں 35 فیصد تک اور پنشنروں کو 17.5 فیصد اضافہ کی صورت میں ریلیف دیا ہے۔

ہفتہ کو اپنے ٹویٹ میں وزیراعظم محمد شہباز شریف نے کہا کہ سیلاب سے متاثرہ علاقوں میں ریلیف اوربحالی، عالمی سپلائی چین میں رکاوٹوں اور جیو سٹرٹیجک تبدیلیوں سے پیدا ہونے والے مسلسل چیلنجز کے پیش نظر آئندہ مالی سال کا بجٹ بنانا خاص طور پر ایک مشکل کام تھا۔