سپریم کورٹ کا مارگلہ ہلز میں مائننگ پر تشویش کا اظہار

سپریم کورٹ میں جنگلات کی زمینوں پر قبضے کیخلاف کیس کی سماعت کے دوران عدالت نے مارگلہ ہلز میں مائننگ پر تشویش کا اظہار کیا۔چیف جسٹس پاکستان نے ریمارکس دیے کہ اسلام آباد کی طرف والے مارگلہ کے پہاڑوں پر درخت نظر آتے ہیں، مارگلہ ہلز کی دوسری طرف مائننگ ہو رہی ہے۔

چیف جسٹس پاکستان نے استفسار کیا کہ جنگلات کی زمینوں پر تجاوزات قائم کی جا رہی ہیں، حکومتیں درخت لگانے کیلئے کیا اقدامات کر رہی ہیں، صوبائی حکومتیں بتائیں کتنے درخت بیچے گئے، اب تک کتنے درخت لگائے جا چکے ہیں، کیا پبلک پرائیویٹ پارٹنر شپ کے تحت محکمہ جنگلات کی زمین لیز پر دی جا رہی ہے۔

صوبائی حکومتوں کے وکلاء نے جواب جمع کرایا کہ عدالتی فیصلے کی روشنی میں تمام لیزز منسوخ کر دی گئی ہیں۔

عدالت نے چاروں صوبوں سے جنگلات کی زمینوں کو واگزار کرنے کے بارے میں تفصیلات طلب کر لیں کہ جنگلات کی زمینوں کو واگزار کرواکر کتنے درخت لگائے گئے۔

عدالت نے مارگلہ کے پہاڑوں پر مائننگ کی تفصیلات طلب کرتے ہوئے کیس کی سماعت ایک ماہ کیلئے ملتوی کردی