شعیب اختر نے زمبابوے کیخلاف پاکستان کی شکست کو شرمناک قراردیدیا

  زمبابوے نے پاکستان کو ٹی ٹوئنٹی میں پہلی بار شکست دی،  جس نے پوری شائقین کرکٹ سمیت سابق کھلاڑیوں کو بھی افسردہ کردیا، کسی نے مڈل آرڈر بلے بازوں تو کسی نے ٹیم انتظامیہ کو شکست کی وجہ قرار دیا۔

سابق کپتان انضمام الحق نے کہا کہ سلیکٹرز نے ناتجربہ بلے بازوں کو سلیکٹ کیا، جو ہار کی بڑی وجہ بنی ہے۔سابق ٹیسٹ کرکٹر شعیب اختر کے مطابق مشکل وکٹ پر بلے بازوں کو احتیاط سے کھیلنا چاہیے تھا، یہ شکست قومی ٹیم کے لیے شرم کا مقام ہے۔رمیز راجہ نے بھی گرین شرٹس کو آڑھے ہاتھوں لیا اور  کہا کہ یہ پاکستان کرکٹ کا سیاہ دن تھا۔ شعیب ملک نے شکست کا ملبہ مینجمنٹ پر ڈال دیا، ان کا کہنا تھا کہ جب کپتان کو فیصلے نہ کرنے دیئے جائیں تویہ ہی نتیجہ آتا ہے۔پاکستانی ٹیم کو انٹرنیشنل وائٹ بال کوچ  کی ضرورت ہے۔

سوشل میڈیا پر مداحوں نے بھی کھلاڑیوں پر خوب تنقید کی اور آصف علی کو ٹیم سے ڈراپ کرنے کا مطالبہ کردیا۔

خیال رہے کہ دوسرے ٹی 20 میچ میں زمبابوے نے پاکستان کو جیت کے لیے 119 رنز کا ہدف دیا تھا تاہم پاکستان کی پوری ٹیم 19.5 اوورز میں 99 رنز بناکر ڈھیر ہوگئی تھی اور زمبابوے نے پاکستان کو 19رنز سے شکست دے کر جیت کا تاج اپنے نام کیا تھا ۔