نئی پی ٹی وی اکیڈمی وزارت اطلاعات کی تاریخ کا اہم سنگ میل ہے، مریم اورنگزیب

اسلام آباد: وفاقی وزیربرائے اطلاعات و نشریات مریم اورنگزیب نے کہا ہے کہ نئی پی ٹی وی اکیڈمی وزارت اطلاعات کی تاریخ کا اہم سنگ میل ہے، میڈیا، براڈ کاسٹنگ، فلمز، اداکاری، ٹریننگ اور صلاحیت سازی کے لئے عالمی معیار کے سینٹر آف ایکسی لینس کا آغاز کرنا میرے مقصد کی عکاسی کرتا ہے، نئی مربوط اکیڈمی پاکستان بھر بالخصوص نوجوانوں کے لئے قابل رسائی ہے۔

اپنے ٹویٹ میں وفاقی وزیر نے کہا کہ پہلی فلم پالیسی کے حصے کے طور پر 13 مئی کو انہوں نے پی ٹی وی فلم انسٹیوٹ کے آغاز اور انفارمیشن سروس اکیڈمی، پی ٹی وی اور ریڈیو پاکستان اکیڈمیز کے انضمام کا اعلان کیا تھا جو وزارت اطلاعات کی تاریخ کا ایک اہم سنگ میل ہے۔انہوں نے کہا کہ نئی مربوط اکیڈمی کا ٹیزر شیئر کرتے ہوئے مجھے خوشی ہو رہی ہے۔

انہوں نے کہا کہ آئی ایس اے، پی ٹی وی اور ریڈیو پاکستان اکیڈمیز کا انضمام اور میڈیا، براڈکاسٹنگ، فلمز، اداکاری، ٹریننگ اور صلاحیت سازی کے لئے عالمی معیار کے سینٹر آف ایکسی لینس کا آغاز کرنا میرے مقصد کے عکاسی کرتا ہے جو پاکستان بھر بالخصوص نوجوانوں کے لئے قابل رسائی ہے، یہ اقدام میرے دل کے بہت قریب ہے۔