لاہور ہائی کورٹ نے پرویز الہیٰ کا جوڈیشنل ریمانڈ ختم کرنے کا فیصلہ معطل کر دیا

پنجاب اسمبلی میں غیرقانونی بھرتیوں کے الزام میں سابق وزیراعلیٰ چودھری پرویز الٰہی نے دوبارہ جسمانی ریمانڈ کیخلاف لاہور ہائیکورٹ سے رجوع کرلیا۔ چودھری پرویز الٰہی کی درخواست میں ایڈیشنل سیشن جج، اینٹی کرپشن تفتیشی اور جوڈیشل مجسٹریٹ کو فریق بنایا گیا ہے۔

چودھری پرویز الٰہی کے وکیل کا کہنا ہے کہ 4 جون کو جوڈیشل مجسٹریٹ نے چودھری پرویز الٰہی کو جوڈیشل ریمانڈ پر جیل منتقل کرنے کا حکم دیا تھا۔ 12جون کو ایڈیشنل سیشن جج نے اینٹی کرپشن کی درخواست بلاجواز منظور کر کے دوبارہ جسمانی ریمانڈ لینے کاحکم دیا تھا۔ 

ان کا مزید کہنا تھا کہ قانون اور انصاف کے طریقہ کار کو پس پشت ڈال کر جسمانی ریمانڈ کا حکم دیاگیا۔ تفتیشی افسر اس مقدمے میں متاثرہ فریق نہیں اس کے باوجود ایڈیشنل سیشن جج نے جوڈیشل ریمانڈ کیخلاف درخواست منظور کی۔ چودھری پرویز الٰہی کے خلاف مقدمات دو برس کی تاخیر سے درج کر کے گرفتاری ڈالی گئی ہے۔

ان کے وکیل نے استدعا کی کہ چودھری پرویز الٰہی کا جوڈیشل ریمانڈ کالعدم کرنے کے حکم کو غیر قانونی قرار دیا جائے۔ چودھری پرویزالٰہی کو جوڈیشل ریمانڈ پر جیل میں ہی رکھنے کا حکم دیا جائے۔ درخواست کے حتمی فیصلے تک ایڈیشنل سیشن کے فیصلے کو معطل کیا جائے۔ 

عدالت میں پیشی کے موقع پر صحافیوں سے گفتگو میں چوہدری پرویز الہیٰ نے کہا کہ میری طبعیت ٹھیک نہیں ہے، 10روز سے جیل کے چھوٹے سے کمرے میں بند کیا گیا ہے۔ جیل کے کمرے میں کبھی پنکھا چلتا ہے کبھی نہیں۔

پی ٹی آئی چھوڑنے کے سوال پر سابق وزیراعلیٰ نے کہا کہ مجھے گھر والوں سے بھی ملاقات نہیں کرنے دی جارہی تو پریس کانفرنس کیسے کردوں، میری حالت آپ کے سامنے ہے، اس حالت میں پیش کیا گیا اور ادھر بھی میڈیا سے بات کرنے سے روکا جاتا ہے