حکومت نے بجلی صارفین کے ریلیف کیلئے171ارب مختص کئے :خرم دستگیر

اسلام آباد: توانائی کے وزیر انجینئر خرم دستگیرنے کہا ہے کہ حکومت نے ملک بھر میں بجلی کے صارفین کو ریلیف فراہم کرنے کے لئے سبسڈیز کی مد میں ایک سواکہتر ارب روپے مختص کئے ہیں۔

ایک نجی نیوزچینل سے گفتگو کرتے ہوئے انہوں نے کہا کہ حکومت کم قیمت پر بجلی کی پیداوار بڑھانے اور عوام کو بلاتعطل بجلی کی فراہمی کے لئے نئے بجلی گھر قائم کرنے پر کام کر رہی ہے۔

۔وفاقی وزیرنے کہاکہ رواں برس قومی گرڈ میں پانچ ہزارمیگاواٹ کے قریب مزید بجلی شامل کی گئی ہے۔انہوں نے کہاکہ حکومت نے اپنے دورمیں بجلی کی قیمتوں میں اضافہ نہیں کیا اوربجلی کی قلت میں بھی بہت زیادہ کمی کی ہے۔

خرم دستگیرنے کہاکہ اگرچہ اس وقت ملک میں بجلی کی کمی نہیں لیکن تقسیم کار کمپنیاں مختلف علاقوں میں لائن لاسزکی درجہ بندی کے حساب سے محدود اوقات کے لئے لوڈشیڈنگ جاری رکھیں گی۔