پنجاب کے دریاؤں میں اونچے درجے کے سیلاب کا الرٹ جاری

لاہور: پراونشل ڈیزاسٹر مینجمنٹ اتھارٹی (پی ڈی ایم اے) نے پنجاب کے دریاؤں میں ممکنہ سیلاب کے لیے ہائی الرٹ جاری کر دیا۔

ترجمان پی ڈی ایم اے کے مطابق 8 سے 10 جولائی کے درمیان دریائے جہلم، ستلج، راوی اور چناب میں انتہائی اونچے درجے کا سیلاب آنے کا امکان ہے۔

ترجمان نے بتایا کہ بھارت کی جانب سے دریائے راوی اور ستلج میں پانی چھوڑنے کا امکان ہے جس سے سیلاب کا خطرہ بڑھ جائے گا۔

پی ڈی ایم اے نے پنجاب کے تمام ڈپٹی کمشنرز (ڈی سیز) اور متعلقہ صوبائی محکموں کو ہائی الرٹ جاری کرتے ہوئے فوری انتظامات کرنے کی ہدایت کی۔

واضح رہے کہ محکمہ موسمیات نے بھی ملک کے بیشتر علاقوں میں آندھی اور تیز بارش کا امکان ظاہر کیا ہے۔

محکمہ موسمیات کے مطابق ڈیرہ غازی (ڈی جی) خان، کوہلو، سبی، بارکھان، ژوب، لورالائی، قلعہ سیف اللہ، موسیٰ خیل اور ملحقہ دریاؤں میں ہفتہ تک موسلادھار بارش کے باعث پہاڑی علاقوں میں طغیانی کا خطرہ ہے۔

دوسری جانب لاہور میں موسلا دھار بارش نے 30 سال کا ریکارڈ توڑ دیا، 10 گھنٹے میں 291 ملی میٹر بارش ریکارڈ کی گئی۔

بارش کے باعث نشیبی علاقے، گلیاں اور بازار زیر آب آ گئے۔ کئی علاقوں میں پانی گھروں اور پلازوں کے تہہ خانوں میں داخل ہوگیا، مختلف واقعات میں سات افراد جاں بحق اور متعدد زخمی ہوگئے۔