ڈیڑھ لاکھ کے قریب حجاج مدینہ پہنچ چکے ہیں، سعودی وزارت حج

مدینہ منورہ: سعودی وزارت حج و عمرہ نے کہا ہے کہ فریضہ حج کی ادائیگی کے بعد اب تک مدینہ منورہ پہنچنے والے حجاج کی تعداد 1 لاکھ 42 ہزار سے تجاوز کرگئی ہے۔

سعودی خبررساں ادارے کے مطابق سعودی وزارت حج و عمرہ کی جانب سے جاری بیان میں کہا گیا کہ حج کے بعد اب تک مدینہ منورہ آنے والے حجاج مختلف ممالک سے تعلق رکھتے ہیں جو بسوں اورحرمین ٹرین کے علاوہ فضائی ذریعے سے بھی مدینہ منورہ پہنچے ہیں۔

وزارت نے کہا کہ الھجرہ شاہراہ پرقائم حجاج کے استقبالیہ مرکز پرآنے والے حجاج کی تعداد 17 ہزار 258 رہی جو 395 بسوں کے ذریعے مکہ مکرمہ سے یہاں پہنچے۔ حرمین ٹرین کے ذریعے 1797 حجاج مدینہ منورہ آئے۔ حجاج کی مدینہ منورہ آمد اوروہاں سے اپنے ملکوں کو روانگی کا سلسلہ جاری ہے۔

حجاج کی روانگی کے حوالے سے وزارت نے کہ اب تک زیارت مدینہ کرنے کے بعد 36 ہزار 963 حجاج اپنے ملکوں کو روانہ ہوچکے ہیں۔ اس وقت 1 لاکھ 5 ہزار 617 حجاج مدینہ منورہ میں موجود ہیں جن کا تعلق مختلف ممالک سے ہے۔