یو اے ای  نے اسٹیٹ بینک میں 1 ارب ڈالر جمع کرادیئے ہیں،اسحاق ڈار

وفاقی وزیرخزانہ اسحاق ڈار نے کہا ہے کہ  یو اے ای  نے اسٹیٹ بینک آف پاکستان کے اکاونٹ میں 1 ارب ڈالر جمع کرادیئے ہیں جس پر پوری پاکستانی قوم ان کے مشکور ہیں۔ یو اے ای نے عملی طور پر دوستی کا ثبوت دیا ہے۔

اسلام آباد میں پریس کانفرنس کرتے ہوئے وزیرخزانہ اسحاق ڈار نے بتایا کہ یو اے ای نے اسٹیٹ بینک کے اکاؤنٹ میں 1 ارب ڈالرز جمع کرادیئے ہیں، جس سے زرمبادلہ کے ذخائر میں بہتری آئے گی، ہمارا ہدف جولائی کے آخر تک ذرمبادلہ ذخائر15 ارب ڈالرز تک کرنے کا ہے۔

انہوں نے کہا کہ وزیراعظم،آرمی چیف کی طرف سےمتحدہ عرب امارات کی قیادت کا مشکورہوں، ہمارے ریزروکی پوزیشن بہتری کی جانب گامزن ہے، پاکستان ترقی کی جانب گامزن ہوچکا ہے

وزیرخزانہ کا کہنا تھا کہ اسٹیٹ بینک کے ذخائر میں 2 دن میں 3 ارب ڈالرز کا اضافہ ہوا ہے، پاکستان کے دیوالیہ ہونے کی قیاس آرائیاں قدرتی موت مرگئیں، ہر آنے والا دن پاکستان کے لیے بہتر ہوگا۔ پاکستان ترقی کی راہ پر گامزن ہے۔

اسحاق ڈار نے کہا کہ پاکستان قائد اعظم کے خواب والا اپنا مقام ضرور حاصل کرے گا، پاکستان اپنی اصل منزل کی راہ پر گامزن ہے۔