مستحکم پاکستان: آبادی اور وسائل کا تعین، لاء اینڈ جسٹس کمیشن آف پاکستان کے زیر انتظام دو روزہ قومی کانفرنس کا آغاز

اسلام آباد: لاء اینڈ جسٹس کمیشن آف پاکستان کے زیر انتظام دو روزہ قومی کانفرنس ‘مستحکم پاکستان: آبادی اور وسائل کا تعین’ کا آغاز جمعہ 14 جولائی 2023 کو سپریم کورٹ آف پاکستان آڈیٹوریم اسلام آباد میں ہوا جس میں سپریم کورٹ، ہائی کورٹس، آزاد جموں و کشمیر کی سپریم کورٹس اور ہائی کورٹس کے معزز جج صاحبان نے شرکت کی۔

کانفرنس میں سپریم اپیلیٹ اور چیف کورٹ گلگت بلتستان، نامور قومی اور بین الاقوامی ماہرین، ماہرین تعلیم، آبادی اور پبلک پالیسی کے ماہرین اور قانونی برادری کے افراد نے شرکت کی۔

کانفرنس کے آغاز پر افتتاحی کلمات میں سیکرٹری لاء اینڈ جسٹس کمیشن آف پاکستان رفعت انعام بٹ نے کہا کہ پاکستان کو آبادی میں تیزی سے اضافہ کے چیلنج کا سامنا ہے جس کے سماجی و اقتصادی اثرات،قومی سلامتی پر براہ راست اثر انداز ہورہے ہیں۔

آبادی میں تیز رفتار اضافہ دستیاب وسائل کو تیزی سے کم کر رہا ہے ۔پانی کی کمی، توانائی کی کھپت، ملازمتوں کی کمی، تنازعات اور عدم تحفظ، صحت کی دیکھ بھال ، تعلیم، بنیادی ضروریات کی عدم دستیابی اور ماحولیاتی مسائل جیسی مشکلات پیدا ہو رہی ہیں۔ جس سے ‘زندگی’ کا معیار متاثر ہو رہا ہے۔