ٹرانس جینڈر بل سے متعلق وفاقی شرعی کورٹ کا فیصلہ سپریم کورٹ میں چیلنج

ٹرانس جیند بل سے متعلق وفاقی شرعی عدالت کا فیصلہ سپریم کورٹ میں چیلنج کر دیا گیا۔ فیصلے کو ٹرانس جینڈر کمیونٹی اور سول سوسائٹی نے چیلنج کیا۔

ٹرانس جینڈر کمیونٹی اور سول سوسائٹی نے خواجہ سراؤں سے متعلق ”ٹرانس جینڈر ایکٹ 2018“ پر وفاقی شرعی عدالت کا فیصلہ سپریم کورٹ میں چیلنج کردیا، درخواست میں سپریم کورٹ سے وفاعی شرعی عدالت کا فیصلہ کالعدم قراردینے کی استدعا کی گئی ہے۔

ٹرانس جینڈر رائٹس کے ڈائریکٹر نایاب علی اور صارم عمران کی جانب سے سپریم کورٹ میں دائر کی گئی درخواست میں مؤقف اپنایا گیا کہ وفاقی شرعی عدالت نے پوری کمیونٹی کو شناخت کے حقوق سے انکار کیا، سپریم کورٹ وفاعی شرعی عدالت کے فیصلے کو کالعدم قرار دے۔ قانون سازی کمیونٹی کے اتفاق رائے کی نمائندگی کرتی ہے، اور قانون منتخب نمائندوں کے ذریعے نافذ کیا گیا تھا۔ وفاقی شرعی عدالت نے اپنے داٸرہ اختیارسے تجاوز کیا ہے۔

خیال رہے کہ وفاقی شرعی عدالت نے خواجہ سراؤں کے حقوق کے تحفظ کےلئے بنائے گئے قانون کو کالعدم  قرار دیا تھا اور قانون کی کچھ دفعات کو اسلامی احکام کے خلاف قرار دیا تھا۔ وفاقی شرعی عدالت نے صنفی شناخت اور وراثت کے حق سے متعلق دفعات کو اسلامی قانون سے متصادم قرار دیا تھا