وزیراعظم، مریم اورنگزیب کا مسلم لیگ ن کے رہنما کے بیٹے کے انتقال پر افسوس

اسلام آباد: وزیر اعظم محمد شہباز شریف نے منگل کو سابق وفاقی وزیر اور پاکستان مسلم لیگ (ن) کے مرکزی رہنما ڈاکٹر طارق فضل چوہدری کے نوجوان بیٹے کے روڈ حادثے میں جاں بحق ہونے پر گہرے دکھ اور افسوس کا اظہار کیا ہے۔

سوگوار خاندان کے ساتھ ہمدردی کا اظہار کرتے ہوئے، وزیر اعظم نے مرحوم کی روح کے لیے دعا کی۔ وزیر اعظم نے کہا "والدین کے لئے، بچے کو کھونے سے زیادہ دل کو ہلانے والی کوئی چیز نہیں ہے"۔

شہباز شریف نے کہا کہ پوری مسلم لیگ ن طارق فضل چوہدری کے غم میں برابر کی شریک ہے۔

دوسری جانب وزیر اطلاعات و نشریات مریم اورنگزیب نے بھی مسلم لیگ (ن) کے رہنما طارق فضل چوہدری کے بیٹے کی سڑک حادثے میں ہلاکت پر دکھ اور افسوس کا اظہار کیا ہے۔

اپنے تعزیتی پیغام میں، انہوں نے کہا: "ہم سوگوار خاندان کے غم میں برابر کے شریک ہیں،" اللہ تعالیٰ سے دعا ہے کہ وہ سوگوار خاندان کو یہ ناقابل تلافی نقصان برداشت کرنے کے لیے صبر جمیل عطا فرمائے۔