اسلام آباد، گولڑہ موڑ کے قریب دیوار منہدم ہونے کے نتیجے میں11مزدور جاں بحق

اسلام آباد: جڑواں شہروں میں موسلا دھار بارش کے باعث پشاور روڈ پر گولڑہ موڑ کے قریب دیوار منہدم ہونے کے نتیجے میں 11مزدور جاں بحق ہوگئے ۔

ابتدائی اطلاعات کے مطابق بدھ کی علی الصبح اسلام آباد اور راولپنڈی میں موسلادھار بارش کے دوران پشاور روڈ پر گولڑہ موڑ کے قریب ایک دیوار گرنے کے باعث11مزدور دب کر جاں بحق ہو گئے، پولیس حکام کے مطابق جائے حادثہ پر امدادی ٹیموں نے مشین کی مدد سے 11 افراد کی لاشیں نکال لی ہیں، ملبے تلے مزید افراد کی تلاش کے لیے ریسکیو آپریشن جاری ہے۔

پولیس حکام کا کہنا ہے گرنے والی دیوار تقریبا سو فٹ لمبی اور 11فٹ اونچی تھی۔گولڑہ موڑ زیر تعمیر انڈر پاس پر کام کرنے والے مزدوروں نے دیوار کے ساتھ عارضی رہائش کے لیے ٹینٹ لگا رکھا تھا۔ریسکیو ذرائع کا کہنا ہے کہ امدادی ٹیموں نے ملبے تلے دبے 4 مزدوروں کو زندہ نکال لیا ہے۔ ریسکیو 1122حکام کے مطابق دیوار منہدم ہونے کی اطلاع موصول ہوتے ہی فوری طور پر ریسکیو ٹیمیں جائے حادثہ پرروانہ کردی گئیں ۔امدادی ٹیموں نے ہنگامی امدادی سرگرمیاں شروع کردیں ۔