وزیراعظم محمد شہباز شریف کا ہجری سال 1445ھ کے آغاز پر قوم کے نام پیغام

اسلام آباد: وزیراعظم محمد شہباز شریف نے قوم کو نئے اسلامی سال کی مبارکباد دیتے ہوئے کہا ہے کہ یہ نیا سال پاکستان اور عالم اسلام کے لئے امن، ترقی وخوشحالی کا سال ہو، سیدنا امام حسین رضی اللہ عنہ اور ان کے جاں نثار ساتھیوں نے سچائی اور عدل و انصاف کے اصولوں کو برقرار رکھنے کیلئے لازوال قربانیاں دیں۔ جبر و استبداد کے خلاف ان کا غیر متزلزل یقین، جرأت، قربانی اور لگن کی لازوال مثال ہے۔

بدھ کو وزیراعظم آفس کے میڈیا ونگ سے جاری کردہ بیان کے مطابق وزیراعظم نے ہجری سال 1445ھ کے آغاز پر قوم کے نام پیغام میں کہا کہ پوری قوم اور امت مسلمہ کو میری جانب سے نیا اسلامی سال مبارک ہو. میری یہ دعا ہے کہ یہ نیا سال ملکِ پاکستان اور عالمِ اسلام کیلئے امن، ترقی و خوشحالی کا سال ثابت ہو.انہوں نے یہ بھی دعا کی کہ اس نئے سال میں پوری دنیا میں جہاں جہاں بھی مسلمان مصیبتوں کا شکار ہیں انکے لئے اللہ رب العزت بے شمار آسانیاں پیدا کریں، کشمیر اور فلسطین کے لوگوں پر چھائے ظلم و جبر کے اندھیرے چھٹ جائیں اور وہاں امن و آشتی کی صبح کا اجالا ہمارے مسلمان بہن بھائیوں کی زندگی ترقی و خوشحالی سے روشن کر دے۔

وزیراعظم نے کہا کہ نیا اسلام سال تاریخ کے ان تلخ لمحات کی بھی یاد دلاتا ہے جب حق و باطل کے معرکے میں آل رسول صلی اللہ علیہ وسلم حضرت امام حسین رضی اللہ تعالی عنہ کی قیادت میں اپنی جانوں کا نذرانہ پیش کرکے رہتی دنیا تک امر ہوئے۔انہوں نے کہا کہ سیدنا امام حسین رضی اللہ عنہ اور ان کے جاں نثار ساتھیوں نے سچائی اور عدل و انصاف کے اصولوں کو برقرار رکھنے کیلئے لازوال قربانیاں دیں، جبر و استبداد کے خلاف ان کا غیر متزلزل یقین، جرأت، قربانی اور لگن کی لازوال مثال ہے، یہ واقعہ ہمیں ہمدردی، انصاف اور اتحاد کی ان اقدار کی یاد دلاتے ہیں جو ہمارے ایمان کا مرکزی جزو ہیں اور ہمیں ناانصافی اور جبر کے خلاف کھڑے ہونے اور ایک ایسے معاشرے کے لیے کام کرنے کا درس دیتے ہیں جہاں امن، ہم آہنگی اور باہمی احترام غالب ہو۔