توہین الیکشن کمیشن کیس میں فواد چوہدری نے ذاتی حیثیت میں معذرت کر لی

توہین الیکشن کمیشن کیس میں فواد چوہدری نے ذاتی حیثیت میں معذرت کر لی۔

فواد چوہدری کے خلاف توہین الیکشن کمیشن کیس کی سماعت ہوئی،چیف الیکشن کمیشنر سکندر سلطان راجہ نے کیس کی سماعت کی

پاکستان تحریک انصاف کے سابق رہنما کا کہنا تھا کہ اس وقت پارتی کی پوزیشن تھی جو میں نے بیان کی،میں پارتی کا ترجمان تھا، میں ذاتی حیثیت میں معذرت کر سکتا ہوں، میری معذرت قبول کریں، شو کاز  نوٹس واپس لے لیں، پارٹی ایک ادارہ ہے، میں ان کا ترجمان تھا، قانونی کیسز میں نہیں پڑنا چاہتا، آپ کے لیے احترام ہے، اس وقت پارٹی کی پوزیشن تھی جو میں نے بیان کی۔

چیف الیکشن کمشنر نے فواد چوہدری سے سوال کیا کہ  پارٹی چیف آپ سے قتل کروائیں تو آپ کردیں گے ؟ اس پر فواد چوہدری کا کہنا تھا کہ میں ایسا نہیں کروں گا۔

چیف الیکشن کمشنر کا کہنا تھا کہ پارٹی چیئرمین کوئی غلط بات کرے تو مان لیں گے؟ آپ کی جماعت نے کمیشن اور میری زات کے حوالے سے کیا کیا نہیں کہا، میری بیوی کے بارے میں اوپن جلسے میں کہا گیا، پھر میڈیا کے سامنے مکر بھی گئے۔

فواد چوہدری کا کہنا تھا کہ سپریم کورٹ کے ججز کے بارے میں کیا کیا کہا جا رہا ہے، میری معزرت قبول کریں اور کیس ڈراپ کردیں۔

چیف الیکشن کمشنرکا کہنا تھا کہ اگر آپ معافی مانگنا چاہتے ہیں تو آپ تحریری معافی دے دیں۔

فواد چوہدری کا کہنا تھا  کہ میں نے زبانی معافی مانگ لی ہے۔ چیف الیکشن کمشنر نےکہا کہ معافی تحریری ہوتی ہے، آپ معافی جمع کرا دیں کمیشن اس پر غور کر لے گا۔

فواد چوہدری کے خلاف توہین الیکشن کمیشن کی سماعت یکم اگست تک ملتوی کردی گئی۔